ISAYA 44 - BIBILLYA Mareiyo Meele a Iruva

Nndumi Iruva mbwe Iruva muni

¹ Kya indi arannya ulaalu ewe Yakobo, ishinga lyakwa, Israeli, shilekusauwa.

² Nndumi Iruva alekutana kupookya efo ndewuny ya mau, we ashekwekyaa aamba kulairyee, ewe Yakobo ishinga lyakwa na yewe Yeshuruni, shilekusauwa.

³ Mmbo shisheletyaa mura uwe ya eto atirwa nnyura, na mifongo yeeke efo ando oomu. Shisholotaa mumuyo wakwa uwe ya vana vafo, na mbora yakwa efo kwa vana vashewonikaa kwafo.

⁴ Na efyo fishuukaa efo mbuveny, sha mierebi, kufii na mira.

⁵ Umwi waawo asheambaa, “Yeny ni wa Nndumi Iruva, ‘Na ungyi ashivaangaa kwa irina lya Yakobo,’ na ungyi ashereiyaa irina lyakwe wokony lwakwe, efo kwa Nndumi Iruva, na akuvaange kwa irina lya Israeli.”

⁶ Nndumi Iruva, mangyi ya Israeli, Nkira wafo, Nndumi muni matorito, aamba indi, “Yeny ni ulya wa mapookyony na yeny ni wa mafurumyony. Mmwasi yakwa, nkwiifo ungyifo.

⁷ A ni vi sha yeny avangaa, na ivambisa mbony eti na ideesya kyakwa, ukya elyo shileumba vandu vakwa elyo mapookyony? Kya efyo fikaa fishe vafyaambee paa.

⁸ Nta mulaire na isaukwa; a ndesa nshilekuongoya mbony eti elyo kasha na ikoora? Na yeni ni vakureekyi vakwa. A ndesa kwiifo Iruva ailanyi yeny? Kya dede nkwiifo isimamba lyingyi-fo yeny nshiishi ungyi-fo.

Maruva a wongo aipalwa

⁹ Yewo veepasha mafwanu woose ni ruu parany, nta mbony tawo, eti tavasennya nshi kindofo. Nta vakureekyi va mafwanu yoo mmbalollye, nta mmbeeshi naambo vakusununde na yaalashika-fo.

¹⁰ A mmbi alensongosia iruva umwi, ao alempasha ifwanu lyilavaa nta itana kindo?

¹¹ Lola vashelemaa, vaoroye vakusanyirye ando amwi, vasalale, vavereye na vakurye woose.

¹² Mfuru wa minya asongosya fyaara, arundaa na muro wa makaa, kasongosya mafwanu na firya kasongosya na finya ya woko lwakwe, eeda, kaitya shaa finya takwe tikaangwa, kara nalana mura mmbo ashuumaa.

¹³ Nndu nseremala nawe mmbo aorota uruu, kareiya na kalamu ya maare kasongosya na randa, kareiya na kalamu ya minya kasongosya sha nndu wa vandu kavaka usuri lwa nndu wa vandu naambo vaambike mmba tawo.

¹⁴ We amanya mieresi, kaipoo na mtirisa na mwaloni, kasauwa nri ukee efo miriny ya ngoroshyony, kavaakya mfinje; mbwa ikanisa.

¹⁵ Numa nndu wa vandu kaonisa ngwi, kautafo mbashwe kaora muro, eeda kaora muro, kakora nkate, eeda kawaallwa ni iruva, kawiindya kapasha maruva kayaindya.

¹⁶ Taari imwi kaimamita na taari ingyi kalya nyama, kookya shoonga tya tookywa kawuura; eeda, kaoora muro, ashambaa, “Apa, shammora muro shamoora muro.

¹⁷ Na kiparwe kyasaau kakyaallwa iruva, nkyo mafwanu alya epasha, kafiirya ndi mbee ya vayo kayaindya, katereva eshambaa, “Shauwa kimmba yewe ni iruva wakwa.”

¹⁸ Mmbaishi nta mmbaitumusoo-fo mashika vakee vafinge miso valalollye, na mirima yaavo valaidimi imanya.

¹⁹ Nta nkwiifo aitumuso nriminy, nta mbatiri urango lwa yaamba, shammamita uvari lumwi murony na lyingyi shankora nkate uwe ya makaa a vayo kyasaau shallyamarya nakyo Iruva? Elu ni uravi; A ndesa shafiirya ndi na iindya kisinde kya nri?

²⁰ Alya mafwi, nrima wakwe urekye ukee ilemba naambo nalakire muu wakwe na imanya kya dede efyo fyoose fya wongo.

Nndumi mmuumbi na mwiikira

²¹ Kummbwa mbony eti yewe Yakobo, neewe Israeli kimmba kukee kishinga kyakwa shilekuumba. Yewe ni ishinga lyakwa; yewe Israeli nshishekurekywaafo.

²² Shilemaa ikusarya marekywa afo sha mafishi maroo na ulyamari lwafo loose, osho shiruuya shammaa ikukira.

²³ Imbeny, eni ngina kimmba Nndumi Iruva mmbwe atana efyo. Roseny unyanga eni mamungo a uruka! Imbeny fiimbo eni mafumbu Na ewe ngorosho na wo nri wiifo kimmba Nndumi Iruva ansauwa Yakobo nawe asheitikiswa kunu Israeli,

²⁴ Nndumi Iruva, Nkira wafo, eto alekutana na ikuumba efo nsangeny aamba indi, “Yeny ni Nndumi Iruva, shiumbye findo fyoose, shaalala ngina yeny shimuni na ivika uruka a mmbi ekee kyimwi na yeny?

²⁵ Shirambwa ngyende ta wongo, na ivavaanga vasukwa, shaviira vaarya numa na yaalasha urango lwawo lukava utondo.

²⁶ Ni yeny shileseleesa kirero kya ishinga na ivaidimisya vatane efyo verye itana, na ivia Yerusalemu, ‘Vandu vasheshaa na isammya kwafo na miri ya Yuda ishesongosyoo, shishesaleesa alya alelyamarwa.

²⁷ Shiviaa ndilyi ‘Umya,’ na yeny shisheumisa mira yafo.

²⁸ Shiviaa Koresh, mwiisi wakwa, nawe eto ashetanaa shaasa shikundye, naakwa ni Yerusalemu ushetanwaa na nsuka wa mmba ya Nndumi Iruva ushevikwaa.’”