ISAYA 42 - BIBILLYA Mareiyo Meele a Iruva

Nndundi wa Nndumi Iruva

¹ Lola ishinga lyakwa shansauwa, nsauwe wakwa, ngoo yakwa yansennywa kyakwe, shammbika mumuyo wakwa kwakwe, nawe ashengyee ulana usumanu.

² Nnyasheongoraa nta ikaba weele neetiva efo shia-fo.

³ Irere lyifwafwa nnyashelyifishaafo, na utambi lutiri nsu nnyashelurumyaa-fo; asheniingyaa uleti kwa waarya.

⁴ Nnyashaaraa nta ifwa nrima-fo, kutani asalallya uleti ulaniny koose naakwa ni ngyuruka ta mbaambaa mmbo tiveraa usumanu lwakwe.

We Nndumi Iruva

⁵ Iruva aamba, yeto aumbye ngina kataala, we alaala ulana na fyeilula fyoose, we aniingye vandu muu veefo woose, we aniingye mumuyo woose vakee ulaniny.

⁶ Yeny ni Iruva shilekuvaanga na usumanu lwakwa, na yeny nshekutiraa woko, shikuringe, shikuvike kuve kyaasa kya vandu vakwa na sa ya vamasanga.

⁷ Ishiisa vafu miso na yaauwa yewo vakee kifingyony, na yuuta yewo vakee ireeminy efo mmba ya kifingyony.

⁸ Yeny ni Nndumi Iruva llyo irina lyakwa na itumbe lyakwa nshisheningyaa ungyifo nta nshiniingaa maruva tikisi yakwa-fo.

⁹ Lola, mbony ta mbee tilemmaa iira, na yeny mmbo nkeamba mbony kulaore tansha, nshikemuvia mbony tavayo.

Kyiimbo kya yaarafuma

¹⁰ Imbyeny Nndumi Iruva kyiimbo kiiya. Na tikisi yakwe kya ufishony lwa ulana: eni musholokaa yeeveny na fyoose fiifo, na maruva na woose veefo

¹¹ Ando kuumu na miri ya vayo yoongore, myuungo ilya vakaa Vakedari, vandu va Sela veembe; vaongore uka kidoorony kya mafumbu.

¹² Vaitikise Nndumi Iruva, vavambise usuri lwakwe urukeny

¹³ Nndumi Iruva asheshaa na ukaari, ashetirwaa nkififi sha nndu wa fira, asheiyaa, ee da asheongoraa, Asheoraa vakiduva vakwe wiidimi lwakwe.

Iruva avika kyaasa kya yeekya vandu vakwe

¹⁴ Fyeeri fyaasha shilewika urilalyi, shilemalallya shasisirya, ulaalu shisheongoraa sha nndu nka kyeeri kya iira mwana shivavyoo na irooyo ni uuwo.

¹⁵ Shishelyamaraa mafumbu na fidooro, shisheumisaa fyoose fyamya-fo. Mira isheumya na marrwa asheumyaa.

¹⁶ Mmbo shisheendee vafu miso vaire shia valaishi, shivatetere shieny valaishi. Shisheallwaa ireema lyive sa mbee yaawo, na ando a imungo ave kurambalalyi. Efi shishevatannyaa nta nshivaraafo.

¹⁷ Vashevirwaa numa, vashesutwa deny, yewo vakuvavye na mafwanu a mawe a uuru uniini veavyaa, “Eni ng'u maruva eru.”

Vaisraeli valemwa ikufunda

¹⁸ Arannyiny, eni vafu maarwi, loleny eni vafu miso naambo mulollye.

¹⁹ A mmbi akee mfu miso kulaore ni ishinga lyakwa? Ao akee mfu maarwi sha nrumi wakwa shanruma? A mmbi mfu miso sha nndu atiri ufoo? Ee da mfu miso sha ishinga lya Nndumi Iruva?

²⁰ Kulollye mbony shiingyi llyo nkukeitumuso-fo. Kulootye maarwi lyo nkwiitye-fo.

²¹ Nndumi Iruva kasennywa kimaruma kya usumanu lwakwe, iindya mavavaso na ialatya.

²² Kya indi vandu eva ni vandu vakee veeve na itirwa mifungwa; woose mmbakee vatirye efo marineny, mbakee vasurumi efo kifingyony vakakamarwa mifungo nta kuleefo wa imwauwa, nta mwiamba vaviirwa.

²³ A mmbi nnang'ani yaany aloota maarwi naitye mbony eti? Naarannyi na iitya kyeeri ekyo kishaa?

²⁴ A mmbi aleuta Yakobo nakamarwa mifungwa na ivika Israeli maakony a vasokyi? Nshe we Nndumi Iruva? Ulya lulellyamarya llya valelema ilatya shia takwe nta iindya mavavaso akwe.

²⁵ Kimaruma kya efyo, kaolota unyafi lwakwe uwe yaawo na finya ya fira ikaata muro taari toose, nta mmbalemanya-fo. Vakasarumya nta mmbalesununda mbony yeyo efo miriminy yaawo-fo.