ISAYA 40 - BIBILLYA Mareiyo Meele a Iruva

Marero a iviirya muu

¹ Viireny vandu vakwa muu, viireny vandu vakwa muu.

² Rereny na Yerusalemu kwa ufoo vavyeny sheelyi ushinga lwakwe lwammisya, uravi lwakwe lwamfwaayo ni elyi ammbwarya kyuuka kwa Nndumi Iruva ngapo tiilanyi uravi lwakwe loose.

³ Aranyiny ni nndu ashonisaa unyanga kulya kasa koomu ashambaa; “Deesyeny shia ya Nndumi, oroteny miko yakwe.

⁴ Wo imungo lyeeremutwa na wo ifumbu lyishefwa-fwalwa; na alya kwevekye kusheorotwaa; na alya kutefusu kusheeremutwaa.

⁵ Na usuri lwa Nndumi Iruva lusheorwaa paa, na woose veefo na muu vashelollya kimmba kana kya Nndumi Iruva kyarera mbony eti.”

⁶ Aranya ni unyanga lwa nndu lweetio eshambaa; “Ilya, shaamba, ‘Shaiya kimaruma kyeekyi?’” Woose veefo na muu nsha mare da na usuri lwa vayo loose nsha kivaro.

⁷ Mare ashuumaa, na fivaro finaa kimaruma kya elyi mumuyo wa Nndumi Iruva waira uwe ya vayo, kya dede vandu eva nsha mare da.

⁸ Mare ashuumaa, na fivaro finaa, kya indi irero lya Nndumi Iruva llisalalaa llung'anu.

⁹ Ewe kukee yaamba nrumi shisha ya nsia efo Sioni, saama uwe ya ifumbu lyaasha, Yewe kukee yaamba nrumi ya nsia Yerusalemu, loota unyanga nnu loota unyanga nta kulairyeefo, via miri ya Yuda: “Loleny Nndumi Iruva waany!”

¹⁰ Loleny, Nndumi Iruva waany ashaa na ukaari, na woko lwakwe ni ushilyi. Ashaa nataiye kya usumanu.

¹¹ Ashiisaa ironda lyakwe sha mwiisi asanyirye mburu takwe maakony akwe, navavike ng'undeny takwe, na tilya tikeota vana tisheteterwa kwa waarya.

Israeli na Iruva

¹² A ndesa ni vi alemmiidima yeesa mura na woko lwakwe naakwa ni yeesa kiluulyi naakwa ni mafu?

¹³ A ndesa ni vi aleruma mumuyo wa Nndumi Iruva, na iulosha aye nteteri wakwe?

¹⁴ A nnyalefisha kyama navi, na mmbowi alenlosha shia ya uvingo kanniinga urango lwa imoora namanyi iitumuso?

¹⁵ Lola, vandu va masanga nsha irony lya mura efo ndoony, nsha kiluulyi kisiise efo meseny ya eesya findo. Lolate, we aidima ipoo maruva sha kindo kinnywa nsele.

¹⁶ Lebanoni nato mmbumaa iva ngwifo nta mafisi eefo nnyamaa iva kirasofo.

¹⁷ Vamasanga woose nshi kindo kwakwe-fo, mmbo vakee kindo kinnywa nsele deny; ni kindo kya nguya.

¹⁸ Naasany, mmbo llushiidimaa yaananisa Nndumi Iruva navi? Ao lumwananise neekyi?

¹⁹ Maruva mmbo asongosyoo maako a vandu avaa yaalasha akakorwa na muro, akaeka na isongosya fyindo fyingyi.

²⁰ Na vandu ngwera yewo valashidimaa iwonisa findo fya usuri mmbo varuuya nri nsha vakapasha maruva awo.

²¹ A ndesa mmulemanya? Mmulemiita? Mmulevio-se ukya mapookyony? Mmulemanya ukya llya ulana luleumbwa?

²² We mmbwe akee rembo uwe ya fyoose na yewo vakee efo ulaniny vakee sha nre; we mmbwe aallye ngina sha shonyi na itiororrwa sha yeema lyekaya.

²³ Mmbwe aalasha vashilyi na ilema vamangyi va ulana vakava nshi kindo-fo.

²⁴ Ni dede mmbalevaakyo uteriny sha mbeu-fo, nta mmbakutiri tapu efo uteriny-fo, vakanaa, uraato lukavaipoo sha mare moomu.

²⁵ A mmbo mushiinanisaa navi naambo shiinani nawe? Aamba Nndumi Iruva mweele.

²⁶ Inweny miso mulole efyo; mmbi aletana eto? Ashendee nsemu wakwe auekennye, ativaanga toose marina a vayo.

²⁷ A nkyikyi elyi kuleamba ewe Yakobo kwaamba ewe Israeli, shia yakwa yansurumwa Nndumi Iruva nalailollye na uvingo lwakwa Iruva nnyalulollyaa-fo?

²⁸ A ndesa yewe nkwiishi? A ndesa nkuleitye? We Iruva wa llung'anu, Nndumi Iruva, yeto aletana ulana nnyaraa nta nnyalalaa-fo wiidimi lwakwe na finya takwe ntivaa isavaiya-fo.

²⁹ Mmbo aniinga finya yewo vaaraye, kaviirya muu yewo vafwafwa.

³⁰ Naakwa ni vakoo vashearaa na ilemwa, na vomi vakoo vatiri finya vashewoo na ilemwa.

³¹ Kya indi ewo vavereye Nndumi Iruva mmbo vashewonisaa finya shiiya, vasherumbuka sha ngoru, naakwa varisha, mmbashearaafo, vasheendaa na marende nta mmbashevinaafo.