ISAYA 38 - BIBILLYA Mareiyo Meele a Iruva

Mangyi Esekia allwaa kyuumu na ishya lyakwe

¹ Nalyo kyeeri yekyo mangyi Esekia kalwaa kyuumu, kafika ando a ifwa, nawe Isaya mwauya fisuku, mwana wa Amosi keenda kammbya, “Nndumi Iruva mmbo aamba indi, songosya mbony ta mmba yafo mashika ifwa ni kuti kufwe, nta nkushekyaafo.”

² Naasa Esekia ekiita indo, keenduta kisangu kyakwe isimambeny katereva Iruva,

³ kaamba, “Woi Nndumi Iruva kummbwa shakutereva, shaasa shileenda mbee yafo na wiindi, shilekwiindya kya dede na nrima moose, shatana mesha mbee ya usangu lwafo.” Esekia kaiya kyuumu.

⁴ Kirero kya Nndumi Iruva kikasheya nkisuku Isaya kyeamba;

⁵ “Enda kwandevia Esekia, Nndumi Iruva wa Davidi, ndoo, aamba indi, shamiita fiterewo fyafo na shalollya misoru yafo; lola shishekwengeryaa suku tafo ando a myaaka ikumi na iraanu.

⁶ Na yeny mmbo shishekuringaa yewe na muri yeu shishekuuta maakony a mangyi ya Ashuru.

⁷ Na elu llo wende lusheukaa kwa Nndumi Iruva kyeora sheelyi Nndumi Iruva ashetanaa shaasa aamba.

⁸ Lola kirishe kishewuyaa numa marende ikumi, alya fitereny filya fyesongosyony mangyi Ahasi.” Kirishe mmbo kikawuya numa marende ikumi kyuuka alya kyeendesa kyemfika.

⁹ Na yaandi nng'u marero a Esekia, mangyi ya Yuda kyeeri alemaa ishia.

¹⁰ Mmbo shileamba mikonu ya ikaa na muu yammesya. Shammeimwa mwengero wa mikonu yakwa.

¹¹ Shaamba nshishelollya-se Nndumi Iruva wakwa efo muriny wa vandu veefo na muu-fo. Nshishelollyaa-se nndu wa vandu na ewo vakee ulaniny-fo.

¹² Kirembo kyakwa kyammamitwa deny; kikaipowa sha yeema lya mwiisa findo; muu wakwa ukakushwa-kushwa sha nndu afuma isara. Shaerwa efo amwi na kitara uka nsanyiny fika kio vashimae.

¹³ Shafiira shiiruuya weekyi kutani kwakya sha miiso idinaa na ipapara maffwa akwa, ukya nsanyiny kutani kwafika kio kashifita ufishyony.

¹⁴ Nshileiya sha ndeye na ikapa kiiyo sha mbeta, shainuya miso akwa uwe kutani shaaraa. Woi nndumi Iruva shanlamyo, osho kushesheekya, kuve ngarami yakwa.

¹⁵ A shaambe inda? We muni ammeamba, na we muni ammetana indo. Shishendaa mbee yakwe na waarya myaaka yakwa myoose kimaruma kya mavavyo a nrima wakwa.

¹⁶ Woi Nndumi Iruva ni yewe kukee uwe ya findo fyoose fiifo na muu; ni yewe kuleshishiisaa na ishivirya muu.

¹⁷ Lola shetiri mavavyo moomu kimaruma kya itura ufoo kya indi kya ikunda lyafo kwashikira na ishuuta ufuny. Mashika mmbo kuleshifwaaya kya ulyamari lwakwa loose.

¹⁸ Mashika efo ando a vafu mmbashidimaa ikwiitikisa-fo nta ufu nlushidimaa ikurumisha-fo. Valya vakee ireka mmbashiidimaa imanya dede yafo-fo.

¹⁹ Ulya akee na muu, eeda ulya akee na muu niwe ashekuitikisaa sha yeny enu. Vandeye veru vashemanyisyaa vana dede yafo.

²⁰ Nndumi Iruva akee ishikira yeny. Naasa lwiimbye Nndumi Iruva fiimbo fyeru mikonu myoose ya muu weru efo mmba ya Nndumi Iruva.

²¹ Mashika Isaya ammaamba naasany uteny nkate wa ntini muvike yoo yuureny nawe asheshyaa.

²² Lyingyi-se Esekia emmaamba, “A kwiifo wende-kyi lwa ishoora sheelyi shisheangaa-se na efo mmba ya Nndumi Iruva.”