ISAYA 37 - BIBILLYA Mareiyo Meele a Iruva

Mangyi Esekia atereva wiikimbi lwa Isaya

¹ Nalyo mangyi Esekia ekiita marero allya karandwa soori takwe, karaa makunnya, kaanga na efo mmba ya Nndumi Iruva.

² Karuma Eliakimu eto ekee mwiisalallya mmba na Shebna, mwireiya, vandevia vaniini va vakohani varee soori ta makunnya, veende kwa mwaawuya fisuku, we Isaya mwana wa Amosi,

³ vakammbia, mangyi Esekia aamba, “Yeu ni nkonu wa ukiva, nkonu wa isutwa na yaararo ni mwana akundye iirwa, kya indi kwiifo finya ya imwiira-fo.

⁴ Kungyi Nndumi Iruva asheitaa marero yoo nsongoru wa vasikari wa mangyi ya Ashuru alerumwa naarare nafyo Iruva eefo na muu, na Nndumi Iruva wafo asheekennyaa marero yoo aleita, fuuya Nndumi Iruva kya efyo filesaau.”

⁵ Naasa vandu va mangyi Esekia vakaenda kwa Isaya.

⁶ Isaya kavavia, “Vieny nndumi waany marero yaa; Nndumi Iruva aamba, nta kulairyee kimaruma kya marero a mangyi ya Ashuru, alya a ishaarara kuleitya-fo.

⁷ Lola shishevikaa mumuyo nnang'ani yakwe nawuye na urukeny lwakwe muni nalyo ashewaawa na usu efo kwakwe.”

Vaashuru vengera iruma rumi ya weeresi

⁸ Naasa Rapishake nsongoru ulya wa Ashuru kawuya kakooya mangyi ulya ekabanaa efo Libna kimmba enkwiipoo efo kakyillya Lakishi.

⁹ Mangyi ya Ashuru keeta mbony ta Tirhaka sheelyi mangyi ya Esopia akee shia ikabana nawe. Karuma vandu vandevia Esekia kyeamba,

¹⁰ “Lola nndu nalakulembe kukusurye Nndumi Iruva wafo. Yerusalemu ni kuti uvikwa maakony a mangyi ya Ashuru.

¹¹ Shilla kwammiita mbony takwa shaasa shantannya miri miingyi na iimamita deny. A ndesa yewe kushekyaa?

¹² A ndesa maruva a vandu va masanga valya vande vakwa valevamamita mmbo valekya Gohasi na Haran, na Resefu na vana va Adini valya vekee Telasari?

¹³ Nkwi akai mangyi ya Hamati na mangyi ya Apadi mangyi ya muri wa Sefarvaimu, Hena na Iva?”

¹⁴ Naasa Esekia kawarya nnrumi yeyo, ekimaa kaanga na mmba ya Nndumi Iruva, kaororwa mareiyo alya, katereva Nndumi Iruva eshambaa;

¹⁵ na Esekia katereva Nndumi Iruva:

¹⁶ “Woi Nndumi Iruva muni matorito, Iruva wa Israeli kukee uwe ya vaserafi, ni yewe kumuni Iruva, mangyi ya vamangyi va ulana loose. Ni yewe kuleumba ngina na uruka.

¹⁷ Loota kuri woi Nndumi Iruva kwaaranyi, lola woi Nndumi Iruva kulolye, kwiitye marero a Senakeribu aleende naambo naarare Nndumi Iruva eefo na muu.

¹⁸ Ni kya dede mangyi ya Ashuru alerumata miri miingyi,

¹⁹ na imamita maruva awo na muro kimmba kulaore ekee Iruva, kya indi ekee mashora a maako a vandu; ekee ni miri na mawe nkyo kimaruma akarumatwa.

²⁰ Naasa woi Nndumi Iruva, Iruva weeru, lukire efo maakony afo; mangyi toose ta ulana tiite na imanya sheelyi yewe ni Nndumi Iruva kumuni nta kulaifo ungyi.”

Viikimbi lwa Isaya kwa Mangyi

²¹ Llyo Isaya mwana wa Amosi karika mbony kwa Esekia kyeamba, “Nndumi Iruva, Iruva wa Israeli aamba endi: Kimmba kwashitereva kya Senakeribu mangyi ya Ashuru,

²² irero arera Nndumi Iruva kyafo ni ekyi, sambura ya Sayuni ishekuteendaa, ishekwiinyala nnu. Sambura ya Yerusalemu ikee irinisa nrwe kimaruma kyafo.”

²³ A ni vi alemwaarara na insakira. Nkukeinwa miso afo na unyanga lwafo kwa vi? Ni uwe kwa mweele wa Israeli.

²⁴ Kulearara Nndumi wafo kwa mashinga afo kwepala kwaamba, kya mitika akwa shansaama uwe ya ifumbu kutani shafika nnang'ani ya Lebanoni na yeny shishemanyaa mieresi myaasha na ubanu myaasha na yeny mmbo nsheangaa na kwakwe ando eele, kwaasha nnu, nrema yakwe ivesye nnu deny.

²⁵ Shansuma kirori na ina mura, na marende akwa meni shisheumisaa mira myoose ya Misri.

²⁶ A ndesa nkwiitye ni yeny shiletana indo llya kasha na uka elyo mapookyony; shashemarisya ulaalu, lyive ishora lyafo ulaalu irumata miri ive nrapu.

²⁷ Nkyo kimaruma vandu vawo vakatura finya, vakatirwa mmbwerei na isavaa nnu; vakavaka mare a mbuveny; lyingyi vakavaka miri mivisi ilatiri finya, sha nganu kulaore tammikkwa.

²⁸ Kya indi shikwiishi, yaanga na isomuka lyafo na unyafi kuletira kimaruma kyakwa.

²⁹ Kimmba unyafi lwafo lulefika maarwiny akwa mmbo shishevikaa minya mbweny yafo na iraya kamu kana kyafo na yeny shishekuviraa na shia ilya sheni kulesha nayo.

³⁰ Na elu llo lushevaa wende lwafo Esekia. Mwaaka yeu mmbo mushelyaa shoonga eto timyaa sheni efo mareminy any. Na mwaaka wa kavii mushelya mbeu ta vayo. Mwaaka va kararu, remeny, vaakyeny mbeu na iilula na ilya.

³¹ Valya valesaau va mmba ya Yuda vashevangaa na ifumbuka.

³² Mashika efo Yerusalemu kusheukaau valesaau na valya efo ifumbuny lya Sioni Nndumi Iruva ashemarisyaa ishora lyakwe.

³³ Naasany, Nndumi Iruva mmbo aamba ule kya mangyi ya Ashuru we nnyasheangaa muriny eu-fo, nta nnyashorisaa mfe wa urovi lwakwe kunu-fo.

³⁴ Shia ilya sheni alesha nayo nnyo ashewuyaa nayo, nnyasheangaa muriny wany-fo. Ni Nndumi Iruva aamba.

³⁵ Na yeny mmbo shisheuringaa na iuleka muri yeu, kimaruma kyakwa na kya ishinga lyakwa, “Davidi.” Ni yeny Yahwe arera.

³⁶ Kio kilya kyeni nsu wa Nndumi Iruva kandewaa vasikari fiku iyana llyimwi makumi nyanya na varaanu va vaasikari, na kyeeri vandu valekwiipoo ngama vakakooya minying'a yaawo.

³⁷ Naasa Senakeribu mangyi va Ashuru kawuya Ninavi kakaafo.

³⁸ Kyeeri ekee itereva efo mmba ya Niskori, maruva awo, vana vakwe Adrameleki na Sheresa vakambwaa na upanga vakarishya uruka lwa Ararati na mwana wakwe we Esra-hadoni kashilya uruka ando a ndeye.