ISAYA 36 - BIBILLYA Mareiyo Meele a Iruva

Vaashuru vaerese Yerusalemu

¹ Wiikee ni mwaaka wa ikumi na kaana wa ushilyi lwa mangyi Esekia. Senakeribu mangyi ya Ashuru kashekabana na miri myoose ya Yuda ikee miringitye ni isimamba; kaivinga.

² Mangyi ya Ashuru karuma ironda iniini lyuuka Lakishi vakafika Yerusalemu kwa mangyi Esekia. Nsongoru wa ironda lilya kasalala ando a kidooro alya maavyony a shia.

³ Kasha nau Eliakimu mwana wa Hikia, ulya ekee mwiisalallya mmba ya mangyi, na Shebna, mwiireiya mbony, na Yoa, mwana wa Asafu, ulya ekee mwireiya fyeeri.

⁴ Nsongoru wa fira Rapishake kavavia, “Enndeny, vieny Esekia mangyi nniini, mangyi ya Ashuru aamba indi.

⁵ A ndesa nkyokyi kukusirye kwakara ishiteenda.

⁶ Lola nkukusirye irere ifwafwa, llyo Misri-llya nndu moose kakusiika nalyo lyishendoshaa ni indo akee Farao, mangyi ya misri kwa yewo woose vammbikye nsia.”

⁷ Kyeendi kwashivia mmbo kuvikye nsia Nndumi Iruva, Iruva weeru, a ndesa nshi we ulya mangyi Esekia alefwafwala ando alya eele eterevya emuviaa, eni vandu va Yuda na Yerusalemu musheterevyaa ando a eele?

⁸ Naasa nkyeni mwiiranyi mangyi yakwa ya Ashuru naambo shimuniinge frasi ta fira fiku fivii kwakooya mutiri vandu vesaama frasi eto.

⁹ A ni inda kushiidimaa ilema yaarannya nnrumi ya nndundi wa mangyi yakwa kukusirye frasi na makari a Misri?

¹⁰ A mmbo shilesha yaa ikabana na imamita ando yaa kulaore shammbesa Nndumi Iruva? Nndumi Iruva ni we ashivia shishe ishekaba muri yeu na iumamita.

¹¹ Naasa Eliakimu mwana wa Halkia na Shebna na Yoa vakivia nsongoru ulya ekee rera, “Woi-dwa rera na vandu ewo vafo kwa kishomu kya Kiashuru mashika yese lwiishi kishomu ekyo; nta kularere neese kishomu kya Kiyuda-fo naambo yewo vakee numa ya isimamba valashe iitya.”

¹² Kya indi nsongoru ulya wa vasikari valya kavavia, “A nndumi wakwa mmbo ashiruma kwa nndumi wafo na kwafo yewe shirere yoo? A ndesa nnyaleshiruma kwa vandu yewo vasalalyi efo isimambeny naambo valye maando awo veni na ina mavaamu awo kyimwi na eni?”

¹³ Naasa nsongoru ulya kasalala kaongora kwa kishomu kya Kiyahudi kaamba,

¹⁴ “Aranyiny kirero kya mangyi ya Ashuru, mmbo aamba endi, ‘Esekia nalamulembe mashika nnyashiidimaa imukira-fo.’”

¹⁵ Nta mulare Esekia namukaarise kya ikusirya Nndumi Iruva eshambaa, “Ni kuti Nndumi Iruva ashemuringaa na muri yeu mmbushemamitwaa ni mangyi ya Ashuru-fo.”

¹⁶ Mulashe yaarannya mangyi Esekia, mashika mangyi ya Ashuru aamba, kuryeny, muruuye ufoo na yeny. Oshony mushelya wo nndu misabibu yakwe muni na ntini vakwe muni; mushena mura wo nndu uuka efo kiroriny kyakwe.

¹⁷ Kutani shasha ishemoondwa na imurwaa urukeny luvakye lwany; lutiri shoonga na mfinyu.

¹⁸ Loleny Esekia nalamulembe eshambaa, “Nndumi Iruva ashemuringaa.” Ndesa mmbo kwiifo maruva alemmiidima iringa vandu kyuuka na maako a mangyi ya Ashuru?

¹⁹ Nkwi akai maruva a Hamati na a Arpadi? Nkwi akai maruva a Sefavaimu? A ndesa valeidimi ikira Samaria uka maakony akwa?

²⁰ A ni maruva angaa alemmidima yauwa vandu vawo kyuuka na maako akwa naambo Nndumi Iruva naidimi ikira Yerusalemu uka maakony akwa?

²¹ Kya indi vandu valya vakamalallya sau, nta mbalerouwa kindofo, kimmba kyekee ni uvavaso lwa mangyi sheelyi valarouwe kindofo.

²² Llyo, Eliakimu, mwana wa Hilkia, mwiisalallya mmba ya mangyi, na Shebna, mwireiya fyeeri vakeenda kwa Esekia, Soori tawo tikee firami vakammbia marero alya a nsongoru wa vasikari we Rapishake.