ISAYA 35 - BIBILLYA Mareiyo Meele a Iruva

Shia ya Weele

¹ Ngorosho na kasa koomu fifure, fisenywa na imya mooro.

² Ishemya fivaro fyiingyi, fiifuraa na iimba na usha, Iruva mmbo ashooraa utore lwa fidooro fya Lebanoni, usha lwa Karmeli na Sharon. Vandu vashelollya usuri lwa Nndumi Iruva weeru.

³ Viiryeny finya maako mafwafwa, na isaleesa marende mafiri;

⁴ Vieny yewo vaereiye nta mulairyeefo, kaaryeny. Lola Nndumi Iruva waany ashaa nataiye kiduva nashemwauwa.

⁵ Lyo vafu miso vashelollyaa na vafu maarwi vasheityaa.

⁶ Fitongororo vasheshongaa-shongaa sha ngashe, na nndu mbimbi asheimbaa. Mmbo ngyusoka tisherukaa efo kasa, mira isheekaa koose efo kasa koomu.

⁷ Nsanga muumu usheva irrwa lya mura na uruka luumu lwiishwe ngyusoka, ando alya elele maparwe kushemyaa mare na marere.

⁸ Na yoo kushevaa-u shia shilangari, nayo ishevangwaa ni shia sheele, vatefusu mbaisheraafo-fo. Ni shia ya iira yewo veelye, yewo vakee kyaaro, nakwa vava mmatondo, mmbasherekaa shieny yeyo-fo.

⁹ Yoo nkushelollyoofo miiso nta ifisi lyinyaasi llyishiraa ando yoo-fo. Ni valya veele vashelollyoo efo shieny yeyo.

¹⁰ Na valya valeauwo ni Nndumi Iruva vawuyaa, vafike Sioni veshiimbaa na ifura lya llung'anu lyishekaa kwawo, vasheishwa seko na ifura ting'wa na ndwari fisherishaa.