ISAYA 32 - BIBILLYA Mareiyo Meele a Iruva

Mangyi nrilalyi

¹ Kushesha mangyi asheshillya kwa urilalyi na vasongoru vakwe vashetetera vandu kwa usumanu.

² Wo umwi mmbo kushevaa sha ando kweyoovya uraato, ando kweekusuruma kyeeri kya kivivita kya uraato, kusheva sha ngyusoka ta mura kundo kuumu. Sha iwe iniini lyikwallye-si efo kasa koomu.

³ Miso awo mmbo alollyaa na maarwi mmbo ashiitaa mbony ta vandu.

⁴ Mmbo vasherundaa mashora awo kwa waantu na valya veererya vandu mmbo vasherummbwa kya usumanu.

⁵ Varung'ani mmbakivaangwa lyingyi varango-fo, nta vandu veekaba ngula ni vandu va tokyi-fo.

⁶ Varung'ani mmbo varera urung'ani, makusaro awo nnya itana makasha, mirunndye yaawo mmikasha na yiinyala Nndumi Iruva. Iveema shoonga vatirwa nshaa na vatirwa nyura iveema mura weena.

⁷ Nndu nrung'ani mmbo atanaa fya urung'ani na itana makasha. Kavika kyama kya wongo kyeiima vakyiva usumanu lwawo.

⁸ Vandu varilalyi mmbo vatanaa fya urilalyi na itannya vandu mesha.

Miloshyo kwa vaka va Yerusalemu

⁹ Kwiipony mushaarannye yeni vaka mulasarye kindo, shaarannyiny yekyo shiifo shimuvyaa, yeni vefu va vandu muuti.

¹⁰ Ando a mwaaka umwi indi, mmbo mupooka isavaa yeni mukee ibira ulaalu mashika fimu fya yuulula na fimu fya sabibu mmbo firumakaa.

¹¹ Rereminy kwa weerei yeni mukee rembo, mulakeesara, rereminy kwa weerei yeni mukee ifureny! Kwaammbweny soori tany mukee mbereto, mukufinngye makunnya fisiny fyany.

¹² Kakapeny mbafu kwa ting'wa kapeny kiiyo kyimaruma kya bustani tilya teekevika kisha nnu.

¹³ Kya minda ya vandu vakwa isheemyaa meera na miraambo yeeda uwe ya mmba ta ifura nnang'ani ya muri utiri ifura na mindoro.

¹⁴ Muri weetiri vandu veengyi mmbo ushevaa sama. Ifumbuu na nnara wa uringyi ni mafisi ashekaa-fo llung'anu, kusheva ifura lya mishungu ya ngoroshony, na ureny kundo kweiisa moonri.

¹⁵ Kutani Iruva ashelubusuyaa mumuyo wuuka uwe. Kupookya yoondo, kasa koomu kashewuya iva nnda mbiiri na marema a uteeri usha ashewuyaa iva nsito.

¹⁶ Llo uleti mmbo lushekaa urukeny lweeke kasa koomu, urilalyi na usumanu lushekaa lusheshillya nnda mmbiiri uvika ndunda shiingyi.

¹⁷ Ishora lya usumanu mmbo lishevaa lya unapwe na ndunda ta vayo lisheva ni urilalyi na nsia wa llung'anu.

¹⁸ Vandu vakwa mmbo vashekaa irembony lya unapwe kundo vakaa kippwa.

¹⁹ (Ngorosho mmbo irumakaa deny na muri wawo umamitwa.)

²⁰ Ngoma ni yaany elyi muvaaya mbeu tany mmbai ya mura, ng'umbe na mishungu yaany tikulyiiya ndesa takunda.