ISAYA 31 - BIBILLYA Mareiyo Meele a Iruva

Iruva asheringaa Yerusalemu

¹ Woshiny lwawo valya veendaa Misri itereva-fo weekyi; woshiny lwawo valya vakusirye frasi, vakakusara makari awo a fira na finya ta vasikari vesaama frasi, valakusurye mweele wa Israeli, nta valaterevaa makusaro kwa Nndumi Iruva!

² Iruva atiri urango mmbwe eende uraato, kindo anrummbwa nkyaalashikaa-fo, ngapo ta vandu veesi na valya woose vakee taari yaawo ni kwakwe tuukaa,

³ Vamisri ni vandu nshi maruva-fo, frasi tawo ni findo nshi mimuyo-fo. Nndumi Iruva koorrwa woko lwakwe valya vakeveekya mmbo vakapa urende na valya vakeyeekywa mmbo vawaa-si. Woose vavii mmbo vamamikaa.

⁴ Nndumi Iruva mmbo eshivia, “Sheelyi miiso ao mwana wa miiso arundumaa eekapannyaa mireiyo yakwe naakwa vasha veesi vafye inda ishekapana nawe, nnyashereswaa ni fyoorongye fyawo-fo, nta yaawukwa-fo. Niindo Nndumi Iruva wa matorito ashoolokaa; ishekapana uwe ya ifumbu lya Sioni na kidooro kyavayo.

⁵ Ngata ndeye irumbukaa uwe ya fifuri fyavayo niindo Nndumi Iruva asheringa Yerusalemu mmbo autauwoo neeuringa.”

⁶ Nndumi Iruva aamba: “Yeni vandu va Israeli, mmbo mulenshilyamarya neeshikapa mungo. Indi ulaalu shiwiiyeny mukasha kwakwa.

⁷ Ukeesha nkonu musheerya kwaasha mafwanu alya any a fesa na saabu mwekusongosikya kwa maako any fikamuteere mukalyamara.

⁸ Vaashuru vashewaawa na usu lyo nshi kwa finya ya vandu-fo. Vaashuru mmbo vasherishaa fira na vana vawo vashetirwa mifungwa

⁹ Mangyi yaawo mmbo asherishaa kwa weerei na vasongoru vawo vashelekeiyaa bendera yaawo kwa weerei. Nndumi Iruva munifinya mmbwe eto muro wakwe ukee muriny Sioni na iriko lyakwe ni muriny Yerusalemu lyikai.”