ISAYA 29 - BIBILLYA Mareiyo Meele a Iruva

Finya ya Yerusalemu

¹ Woshiny lwafo Yerusalemu masabahu a Iruva, muri Davidi emannya ulale lwakwe! Myaaka mmbo ikeesha na yiira na yeengera ivika sukukuu tafo.

² Indi yeny Iruva mmbo shimweenngye ngapo yeni Yerusalemu kusheva-fo kiiyo neefira na muri mmbo ushevaa sha masabahu yaletywa mura wa samu ya vandu vafu.

³ Mmbo nshiipoo fira shikape Yerusalemu, nsheulengetya neeukapa.

⁴ Mmbo usherwa kwaasha nnu, nnang'ani ya uteeri kuuka yefo uteeriny sumbai mmbo ashuuka efo sumbai kiluulyiny; na unyanga luvaa sha lwa kwa nndu wa varumu.

⁵ Vakiduva vafo mmbo vashevaa sha kiluulyi, yewo valekwaafinya mmbo vashevaa sha muulu. Nafyo mmbo fishetanyika tiny.

⁶ Nndumi Iruva wa matorito mmbo ashekweekya, mmbo ashaa na iruruma kidina-si na unyanga uniini, kitita-si uraato lung'ani na muro urumataa.

⁷ Masanga moose yoo akooywaa eekapaa Yerusalemu na iwunndwa turuve tawo na eveengye usau, mmbo vasherumaka sha yoorya lya kio.

⁸ Masanga moose yoo akapa muri wa Yerusalemu, mmbo vavaka nndu atirwa nshaa akeyoorya akeelya, indi kyeeri ashekwiipoo kakooya mmbo atirwa nshaa mmwasi; ao nndu atirwa ni nyura akeyoorya akeena mura indi kakwiipo uroo lwiikalukye.

Nrenga ya yiila wiikimbi

⁹ Engereny iva varung'ani, veny mbafu miso, veny mmbanangwa mulaniiye mfinyu singe-singeny mulaniiye wari.

¹⁰ Nndumi Iruva mmbo amoolotya rrwe shiroo kasikya vakisuku miso awo, valya veelollya ando a vandu vakawaawa miso awo.

¹¹ Naasa ukisuku lwa mbony yei, ni kimwi sha nndu akureiya barrwa kavika kyitabuny kikee kireaye na lakiri. Kwarwaaya nndu eeshi isoma, kwammbya, “Ankyeshisomya kyitabu ekyi, mmbo akuviaa, ‘Nshiidimaa-fo mashika mmbo kikee kiraye na Lakiri.’”

¹² Naakwa kwaniinngya nndu aleeshi isoma kwammbya, “Shisommya kyitabu ekyi,” mmbo akuviaa “Nshiishi isoma-fo.”

¹³ Nnndumi Iruva mmbo aamba, “Vandu eva vakee ishiinndya kwa marero-nsi na kunu mirima yaawo mmbo ikee kwaasha na yeny. Mmbo vashiinndyaa velolaa mikaaye ya vandu-nsi.

¹⁴ Ulaalu mmbo shiitannyaa vandu eva kindo kya wende na kyeeresye. Neewo vatiri urango na waarya fyoose fishenyanyaka.”

Nsia usheshaa

¹⁵ Woshiny lwaany, yeni mukeesur uma Nndumi Iruva efyo mwiifo mufitannya efo ireeminy, mukakusara nkwiifo nndu amamyaa nta imulollya efyo mwiifo mutanaa.

¹⁶ Eni findo mukeetana ni fya kilasha deny! A ndesa, muumba nungu, na nungu nkindo kimwi? Nungu ishiidimaa ivia yeto mwiiyuumba, “Nshi yewe kuleshuumba.” Ao nta, “Nkwiishi kindo kukeetana?”

¹⁷ Ni kivero-nsi nsito wa Lebsnoni, waaluwa nnda mmbiiri na nnda mmbiri waaluwa nsito.

¹⁸ Nkonu yeto vafu maarwi vashiita mbony yiisomwa kyitabuny na wooka ireeminy vafu miso vapooke ilollya.

¹⁹ Yewo veekunyiisa na vaturi vashekooya ikyesa wiiya efo kwa Nndumi Iruva, na yewo vakee vaturi vashekapaa nndoro wiiya kimaruma kya Iruva wa Israeli.

²⁰ Vandu mbafu mmbo vashemamitwaa neewo veinyala Iruva vashesya, neewo vakusarye itana makasha mmbo vasherumatwaa.

²¹ Mmbo vashemamitwa valya woose vasheniinngyaa ukureekyi lwa wongo ireta usumanu lwa nndu ibaraseny lya irummbwa myaandu.

²² Kweekyo Nndumi Iruva yeto alekapannya Abrahamu mmbo aamba indi kya vana va mmba ya Yakobo, “Vana va mmba ya Yakobo, mmbakisutwaa lyingyi-fo mmbakisurumaa lyingyi fisangu fyawo kimaruma kya usutu-fo.

²³ Kyeeri vashelollya vana vawo, yewo shilevawonisya yeny shimuni mmbarumisha irina lyakwa yeny mweele wa Yakobo; llyo musheshiinndya yeny Iruva mweele wa Israeli.

²⁴ Valya vatondo llyo vashekuloshaa na imanya, na valya vakee variiti fyeeri fyoose llyo vakunda ikulosha.”