ISAYA 28 - BIBILLYA Mareiyo Meele a Iruva

Wiikyimbi kwa umangyi lwa taari ya ndoo

¹ Woshiny llwa umangyi lwa Israeli lwammbwa! Itumbe lya vayo mmbo likeemamika sha kivaro kyikeyuuma. Itumbe lyemmiwala-wala yefo muungony lyitiri uteri usha, na mirrweny yaawo ni vandu vanangwa vakailannya.

² Nndumi mmbo ansauwa nndu wakwe nkaari atiri finya avakye mmbwa ya mawe na uraato lung'ani, mmbwa ing'ani na mura ushoona na kwa woko mmbo ashevatuula sumbai.

³ Ukushobi lwa vandu vanangwa va Israeli mmbo lushevavarywa-vavarywa sumbai.

⁴ Itumbe lyakwe mmbo lyishemamika sha kivaro kyikeyuuma, itumbe lyikushobye lyikee imungony kundo kutiri uteeri usha mmbo tishevakaa tini ta fimu fyiiya kyeeri tavira, nndu katilollya mmbo ayayaa neelya yoo kweni.

⁵ Nkonu yeto Nndumi Iruva wa matorito mmbo ashevaa ureto lwa itumbe, sha kilemba kisha kwa vandu vakwe valya vasaa-fo.

⁶ Mmbo ashesongoya valeti va maakaminy, neewo veetana fya usumanu neewo veeringa ngiri ta muri ashevaniinga finya.

Isaya na vakisuku vanangwa va Yuda

⁷ Mashika kwiifo vakisuku na vakohani vengyi vanangwaa mmbwari, neesinga-singa efo shia kyimaruma kya unangwa; yee vakohani na vakisuku mmbo vananngywa mfinyu, vakafulutwa ni mfinyu, vakasinga-singa kimmba kya wari nnyasi usukukkyo lwawo lukareka, vakateere yuutya vandu uvingo lusumannyi.

⁸ Mesa eto kundo kweekaya mmbo tiishwe uraako, kulaiyo ando kuvaa ikaa rembo.

⁹ Nawo vakantatala veeshaamba, “Nkisuku yeu mmbovi akunndye illosha? A ndesa mmbo avikye nsia sheelyi kwiifo kindo ashiidimaa iluvia? A yese mmbo lukee vana fitorwa?

¹⁰ Mmbo akeelulosha sha vana vadu, nstari kwi nstari, irero kwi irero.”

¹¹ Kyasiany, kwakooya mulashaarannya, Nndumi Iruva asherera na vandu yeva kwa shia ya kishomu kya vandu veny.

¹² We mmbo alemuniinga moose ando kusha kweiimuya, indi mmulekunda imwaarannya-fo.

¹³ Kweekyo ulaalu Nndumi Iruva mmbo akeendellosha irero kwa irero, nstari kwa nstari kyenga kwi kyenga. Nalyo mmbo vashepooka irisha, indi wo irambo kushiipo mmbo kundewaa-si numa kufike urende na mafurumyony kushetirwa neekurikwa mifungwa.

Iwe lya Nndumba Sioni

¹⁴ Ulaalu arannyiny irero lya Nndumi Iruva yeni vandu mutiri kiila mukeeshillya vandu va Yerusalemu.

¹⁵ Yeni mmbo mukeekushoba sheelyi mmbo mulemma ireiyana ishingo na ufu, mukamaa yiirikyana na varumu. Eni mmbo mukeyaamba vai, naakwa nsindara washa, mmbulumbaana-fo, mashika yeni mmbo mukusirye yaamba wongo na ulembi lukava llo kisiiko kyany.

¹⁶ Mmbo Nndumi Iruva aamba indi, “Lolaany! Mmbo shikeevika iwe lya Sioni lya nsuka lyikee yiikare lyitiri finya. Nnang'ani ya-vayo mmbo shikeevika iwe lya ndumba lyikee ireiye marero yaa, ‘Mwiikusirya-u nnyasingaa-fo.’

¹⁷ Usumanu llo lushevaa nkova lwa iveiya mmba na udede lusheva simbiri yakwa yeesaleesa mmba yakwa.” Mmbwa ya masaawe nnyo ishevivyaa kwaasha wongo yelo mukusaraa na ivelo lya mura mwiingyi, lyishelyamaraa kisiiko kyany.

¹⁸ Yoondo llyo ishingo lyany na ufu lyishefishwaa na kyaasa kyany na varumu kyishekabwa nstari. Kyeeri nsindara ulya ung'ani usheshaa llyo ushemutuula sumbai.

¹⁹ Mmbo kishemukooya lyingyi wo nkonu ngama, nsanyiny na nkwaany. Wo nrumi shiiya yuuka kwa Iruva mmbo imweenngye weeresi!

²⁰ Mmbo mushevakaa nndu wa kyaaso, akunndye ikoorwa yoo kitareny, lyo kitara nkifii kikailannya, ao ikusikya na isullya lyikee idu lyikailannya.

²¹ Mashika Nndumi Iruva, mmbo ashekwiipoo sha kulya ifumbuu Perasimu, eshaaka kwa nyashi sha kulya imungony Gibeoni. Mmbo ashiitya uramba lwakwe lwa wende mmbo arundaa mashora akwe aeresye.

²² Naasa mulasheeva na kyiila fifungo fyany filaseyiiniwa mmwasi. Mashika mmbo shiitye sheelyi Nndumi Iruva wa matorito ankudeesya imamita ulana loose.

Urango lwa Iruva

²³ Loota maarwi mwaarannye yekyo shiifo shimuvyaa, keeny miso mwaarannyi marero akwa!

²⁴ A ndesa mwiirema naambo avaakye mmbo aremaa-nsi? A mmbo engera irema neevavarya nrema-da?

²⁵ Oode, kamma irema neevavarya nrema yakwe mmbo avaaya mbeu shive na shive, kavaaya na shayiri kwa ilatya mistare, neefo nnyanuny ya nrema kavaakya-fo mbeu tingyi.

²⁶ Nndu yeto mmbo eeshi kindo akeetana, mashika Iruva wakwe mmbo akeellosha.

²⁷ Bisari nnyiremywa kwa ntambo-fo, nta jira kwa ikari lya ng'umbe-fo, indi bisari mmbo iremmywa na kivambo na jira kwa mbiiri shisiise.

²⁸ Mwiiremya nganu yakwe nnyaremmya neefisha-fisha-fo, mmbo eeshi ngata ya iremmya kuleefo ilyamara nganu.

²⁹ Wiidimi elu nalo ni kwa Nndumi Iruva wa matorito luukye. Uramba lwa Iruva mmbo lweeresye na urango lwakwe llwa usumanu nnu.