ISAYA 27 - BIBILLYA Mareiyo Meele a Iruva

¹ Nkonu yeto Nndumi iruva mmbo ashesommwa usu lwakwe woovi, uniini lutiri finya ashewaa nalo dude Leviyatani ishoka lyirumbukaa na ilembi, Nndumi mmbo ashewaa ishoka elyo lyikaa efo yeeveny.

² Nkonu yeto Nndumi Iruva mmbo ashaamba nnda wakwa wa misabibu,

³ “Yeny mmbwe mwiirema, mmbwe mwiilyinisa kyeeri kyoose, mmbwe mwiilyiringa kio na nsanyiny lyilashelyamarwa ni nndu moose.

⁴ Nshikyisuuye lyingyi kya nnda yeu-fo kukooye kweifo miinga nsuusu mmbo sheewaana nayo neikora muro.

⁵ Kweekyo kwakooya vakiduva va vandu vakwa vakunndye uringyi lwakwa, varuuye urilalyi na yeny, yee varuye urilalyi neeny.”

⁶ Kusheshaa mikonu vana va mmba ya Yakobo miraari ishevanga sumbai, fivaro fya vana va Israeli fivike na ndunda tikwaani ulaniny koose.

⁷ Ngapo ya vana va Israeli yuuka kwa Iruva nnyilefiikya ilya ya vakiduva vakwe-fo. Vaisraeli valefiiya fireny ni vaangu ngota valya va vakiduva vakwe.

⁸ Irrawaa usamirony nnyo ileva ngapo ya vandu vakwe. Kyeeri uraato uniini lulesha luuka na taari ya ngama, mmbo alewoota-fo kwa ngapo shinyaasi.

⁹ Yei nnyo ngata ukasha lwa vana va mmba ya Yakobo lushootwa-fo, niindo ulyamari lwakwe lushesarywa na irekyeka, mmbo ashelyamaraa fitara fyeerasya maruva a wongo, mawe avayo ashesewa-sewa sha yeela, Ashera nta na fitara fyeerasya ubani mfirewaa-u-fo.

¹⁰ Muri ulya utiri turuve wammba irama, wanrewa-u na isamwa sha kasa koomu; ulaalu kwammba kundo kweelya na yiimuya mafisi a ngoroshony.

¹¹ Maramba a miri ammuuma neefika-fika, vaka vakashesana-fo ngwi teyaata muro. Kweekyo vandu eva mbalemanyi kindo-fo, kweekyo Iruva muumbi waawo nnyavalyillya-fo nta ivakureekya-fo.

¹² Nkonu yeto kupookya mura wa Efrate kundefika nnyanuny wa Misri, Nndumi Iruva mmbo asangirya vandu vakwe, umwi umwi sha nndu asheela nganu yakwe.

¹³ Elyi nkonu yeto usheshaa mmbo wombe lushekapwaa lweevaanga vandu woose wooka Ashuru na Misri Vaisraeli woose kundo vakee ushingeny. Mmbo vashaa isheinndya Nndumi Iruva uwe ya ifumbuu yeele kulya Yerusalemu.