ISAYA 26 - BIBILLYA Mareiyo Meele a Iruva

Iruva asheniinga vandu vakwe uvingo

¹ Ukeesha nkonu vandu vasheemba kyiimbo ekyi yefo urukeny lwa Yuda: yese mmbo lutiri muri wa finya, Iruva mmbwe nringyi weeru.

² Rua ngiri ya muri isanga isongovisi lyaange nafo, isanga vandu vawo vatanaa efyo fikee fya usumanu.

³ Yewe Nndumi Iruva niinga vandu vafo urilalyi lwa tokyi, kwavaniinga elyi vakuvikye nsia yewe.

⁴ Vika nsia kwa Nndumi Iruva mikonu myoose, mashika we ni nringyi wa llung'anu.

⁵ Alemfweerisa valya veekushopaa, kalyamara kundo veekaa miri itiri finya kawunndwa masimamba a vayo akawa-si yoo kiluulyiny.

⁶ Ulaalu miri ilya yaawo mmbo ikeevavarrwa vavarrwa na marende a vandu ngwera na vaturi.

⁷ Shimamiri shia ya nndu nsaari kundo koose ashiiraa kwayallwa shoorotu.

⁸ Yee, Nndumi Iruva ni efo usumanu lwafo, nailatya mirumbuye yafo nkyo kindo efo miriminy.

⁹ Elyi kio ni yewe shikuvereya na nrima wakwa moose, kyeeri kusherumbuyaa mwaandu vandu vafo llyo vashemanyaa sheelyi usumanu nkyokyi.

¹⁰ Na kwakooya kwatannya valyamari mesha. Mmbakundaa ikulosha itana filya fikee fya usumanu-fo. Naakwa ni yaandi urukeny lwa vandu vasumanu vakeetana makasha tupu, vakalema imanya na yiinndya uniini lwafo.

¹¹ Ee Nndumi Iruva mmbo kwammipoiyo woko lwafo lwa ngapo uwe, indi mmbalollye-fo, ankkye woore shaasa kukunndye vandu vafo, nawo vasuke, Muro wa nyashi yafo uvarumate.

¹² Ee, yewe Nndumi Iruva kullusimba urilalyi, kwainutya mashora eru moose.

¹³ Nndumi Iruva, Iruva weeru, lulenshillywa mmbandu vengyi na maruva awo, indi yewe kumuni mmbwe Nndumi Iruva weeru.

¹⁴ Vandu yewo mmbo valemfwa nta mmbeefo na muu-fo, vammba varumu nta mmbarukaa-fo, mashika mmbo kulevarumata kushu; nkwiifo nta umwi ashevakummbwa lyingyi-fo.

¹⁵ Nndumi Iruva mmbo kuleng'anisa isanga lyeru kweengera minyanu yavayo taari toose, neekyi kyikakweenngye itumbe.

¹⁶ Yewe Nndumi Iruva mmbo kulekapa vandu vafo, na kyeeri valevavywa vakakuruuya.

¹⁷ Yewe Nndumi Iruva mmbo kulelweenngye lukaffwa sha nka akeelyiwa ni usu lwa mwana.

¹⁸ Mmbo lulelyiwa ni usu lwa mwana indi lukawona uraato. Llulewona-fo mbusha nta imwi ya uruka lweru-fo. Nta lluleidima yeengera yeekyena lya vandu urukeny-fo.

¹⁹ Vandu veru valemfwa mmbo vasherukaa miilyi yaawo ishekaa iruke, vashekwiipo na yiimba kwa ifura. Iruva ashevaviryaa muu na laura yakwe na valya vakee kwa vafu vashesomuka veifo na muu.

Vammutywa uvingo vakaniingwa uleke

²⁰ Angeny na mmba kwany vandu vakwa, mukakuraiya yefo mmba. Mukusurumi kwa kyeeri kyifii kutani nyashi ya Nndumi Iruva yasia.

²¹ Nndumi Iruva akeesha ooka efo kyeny kwakwe iruveeu kya ngapo ya vandu va ulana kwa mitannyi yaawo mikasha. Ivautya uvingo valya valewaa vandu kirika mmbo vashemanyika paa na valya valewaawa nawo ni kiwo.