ISAYA 25 - BIBILLYA Mareiyo Meele a Iruva

Kyiimbo kya irumisha Iruva

¹ Nndumi Iruva, yewe mmbwe Iruva wakwa; yewe mmbwe shikwiinndya na irumisha irina lyafo, Mashika mitanyi yafo mmbo yeeresye, nayo kwayiinutya kwa urilalyi na usumanu, uramba kweevikye ukya kasha.

² Kwaallwa muri ulya ukava mbillya ya mawe, muri weetiri turuve ukalyamarika, mmba shisha ta kimangyi tikamamika nta tilakaa titanwa lyingyi wiiya.

³ Kweekyo vandu valya vatiri finya mmbo vashekwiinndya, na miri ya masanga mbafu ishekweereya.

⁴ Mashika yewe mmbo kuleva turuve ya ngwera, turuve ya vaturi, efo ngatareny tawo yewe mmbwe kirishyony kyeeri kya kitita-si. Kirishe kyeeri kya mwi wa kirangasi, Ni dede ngapo ya vandu mbafu ivavaa ngata ya uraato lwa kitita-si.

⁵ Sha kirangasi kundo kwa uruka wuumu; indi yewe Nndumi Iruva kwamalalyisa vakiduva veru, kwamalalyisa fyoorongye fya vandu mbafu, sha elyi ifishi lyirelelyisaa kirangasi kya mwi.

Nndumi Iruva adeesya kyeelya

⁶ Yaandi ifumbuu lya Sioni Nndumi Iruva munifinya ashedeesya shoonga ya masanga moose a ulaniny, Shoonga shisha na mfinyu.

⁷ Llyo asheannwa-u ifishi lya fyoova na mavavyo a myaaka miingyi kwa masanga moose.

⁸ Nndumi we Iruva mmbo ashemamita ufu llung'anu! Mmbo asheangata misoru ya wo nndu efo misony akwe neewoota usutu elo lulenvarovya ando koose yaa ulaniny. Ni Nndumi Iruva muni aamba.

⁹ Elyi ekyo kisheutika, llyo wo nndu ashaamba, “We mmbwe Iruva weeru! Yeto lummbikye nsia, ulaalu mmbo lutiri nsia na ifura mashika anlukira.”

Nndumi Iruva arikaa ngapo kwa Moabu

¹⁰ Nndumi Iruva mmbo asheringaa Sioni, indi vandu va Moabu mmbo vashevavarwa-vavarwa urukeny lwawo sha mare moomu irininy lya kirashi.

¹¹ Mmbasheorrwa maako sha nndu akunndye ikyeleya, indi Iruva mmbo ashevatuula-si na maako awo ave nsele-sele.

¹² Ashewunndwa turuve ta Vamoabu ando amwi na masimamba awo maasha ashevawunduya yoo kiluulyiny-si.