ISAYA 24 - BIBILLYA Mareiyo Meele a Iruva

Nndumi asherika ngapo ulaniny

¹ Ulaalu Nndumi Iruva akeerumata ulana kulalollywa-fo kindo. Asheottwa usangu lwa ulana na vandu veefo woose vanyanyake.

² Ekyo mmbo kyishekooya wo nndu, nkohani na nndu wa mwiina, ishinga na nndumi wakwe, mwana wa mashora na muni mashora. Mwiikumba na mwiiyuura mwiiyakuya na mwiiyaakkwa, vatiri na valatiri.

³ Ulana mmbo lushelyamarwa deny na imamitwa, ni Nndumi Iruva aamba.

⁴ Ulana mmbo lushuuma na ishovya, uruka mmbo lukeesavaa na ishovya, ng'iniu na ulana fikashovya.

⁵ Vandu vantefusa uruka elyi valefisha mavavaso a Iruva; vakeenda kilasha na uramba lwakwe, vakafisha mma yakwe ya llung'anu.

⁶ Kimmbe indo kidengo mmbo kikeemamita ulana, vandu vawo mmbo vakeelya ukyiva kya mikaaye yaawo. Vandu urukeny mmbo vammaangwa, ni vaangu deny vasaae-fo.

⁷ Misabibu mmbo ikeyuuma na mfinyu ukaviika, valya woose veetiri ifura, ulaalu ni ting'wa na ikunarya.

⁸ Ulaalu, ngoma, fivale, sese, mindoro, mbasa na yiimba fyammanda.

⁹ Nkukyiifo lyingyi ina mfinyu na yiimba-fo efo kwa veena mfinyu ukeedooka.

¹⁰ Muri ulensamwa wammiishwa ulyamari, wo mmba mmbo ikeeshifinge alasheyaanga-fo nndu.

¹¹ Efo shia vandu mmbo vakeekapa kyoorongye, mashika kulakyiifo lyingyi mfinyu. Ifura llyikyiifo lyingyi-fo, mmbo lyammbikwa ishingo urukeny.

¹² Miri mmbo yammba irama na ngiri ta-vayo tanfishwa.

¹³ Niindo kishevaa, kya wo isanga ulaniny koose. Ni kyimwi sha miseituni myaangu yasaa efo nriny wa nseituni kyeeri kya yuulula, ni indo kyishekooya iva efo ngyurukeny shoose, ni vandu vaangu vashesaa-fo na muu.

¹⁴ Ewo vashesaa-fo mmbo vashoonisaa unyanga veeshiimba neefura. Valya va taari ya nkwany mmbo varumishaa wiidimi lwa Nndumi Iruva.

¹⁵ Valya va taari ya ngama mmbo varumisha Iruva. Na valya vakee mbaa-mbaa ya yeeve mmbo varumisha Nndumi Iruva, Iruva wa Israeli.

¹⁶ Mmbo lwiitye fiimbo fyeerumisha fyuuka taari ya kwaasha ya ulana, fiimbo fyeerumisha Iruva wa usumanu. Indi yeny nkukyiifo kindo shikivikye nsia-fo! Mmbo shikeyeengera inyarika. Vakiduva mmbo vakeengera ishiriinngya, woshiny ni lwakwa yeny. Uriingyi lwawo mmbo lukeyeengera ing'ana mmwasi.

¹⁷ Aranyiny shimuvye, weeresi, mashombo na mireiyo mfyo fimuvereyi eni vandu va ulana.

¹⁸ Yeto aturunnya weeresi, mmbo asheolokaa ishombony; yeto asheturunya ishombony, mmbo ashetirwaa ni nreiyo. Mmbwa ing'ani yeeresye mmbo ipusukaa yuuka nginii-u na misuka ya ulana ishering'inaa.

¹⁹ Ulana mmbo lushefika-fika nguka na ipaparika na isingasinga.

²⁰ Ulana lusinge-singe sha nndu ananngywa mmbwari na ivivitwa sha itengo lyivivitwaa ni uraato uniini, ulana mmbo lwanrovywa ni ulyamari uniini, nalyo mmbo lushewaa lulashiidimaa isalala lyingyi.

²¹ Nkonu yeto ukeesha, kyeeri Nndumi Iruva ashekapaa yewo vatiri finya nginii-u na valya veeshillya ulaniny.

²² Mmbo vasheummbywa woose irininy sha vafungwa vasheerywa kifingyony ando a myaaka miingyi kutani nkonu yeto wa ngapo yaawo ushefikaa.

²³ Mwiiri ushetiraa irema na mwi mbushevaa-fo, mashika Nndumi Iruva muni finya mmbwe ashevaa mangyi. Mmbwe asheshillya Yerusalemu kulya ifumbuu lya Sioni na vasongoru va vandu vashelollya itumbe lyakwe.