ISAYA 16 - BIBILLYA Mareiyo Meele a Iruva

Moabu vatereva weekyi luuka Yerusalemu

¹ Kurikeny ishoonri kwa mwiishillya uruka mwiishillya uruka lyuuka kunu kasa koomu ka Sela mundefita kulya Yerusalemu.

² Mmbo vavereye mbai ya mura wa Arnoni, veraa-raa kunu na kunu valeeshi kundo kweyeenda, sha ndeye taattwa fifuriny fyavayo.

³ Vakavia vandu va Yuda, “Luniingeny makusaro luvieny kundo lusheenda nafo luniingeny kundo lukusurumaa. Mulasheyaamba kundo lukai yese veerishiswa.

⁴ Veerishiswa va Moabu vasuruminy kunu kwany vakee kwaasha na vakiduva vawo.” Elyi fira fishemandaa, neewo vewaa vandu vashesamaa.

⁵ Llyo umwi wa mmba ya Davidi ashevikwa nave mangyi. Mwiishillya nsaari na nsongovisi yeto ashekooya iniinga vandu usumanu lwawo.

⁶ Nalyo vandu va Yuda vakaamba; Lwammita ukushobi lwa vandu va Moabu, mmbo lwiishi nnu mbony ta ikushoba lyawo, ukushobi lwawo ukaidi na umbafu, indi efyo fyoose ni kyimwi na kyimwi!

⁷ Ulaalu Vamoabu mmbo vakee fiira woose mmbo vakee yiiya uruka lwawo, mmbo vaiyaa nnu kyeeri vakeekummbwa shoonga tilya shisha veekeelya kulya Kir-hareseti. Mmbo varishiiswa varekkywa.

⁸ Marema a Heshboni mmbo ammba isoola, naakwa ni sabibu tilya ta Sibma nato tallyamarwa, tilya teekee unangwa lwa vasongoru va masanga. Nato tikakwaana Yaseri fika kasa koomu, maramba a vayo akakwaana koose akakyillya kwakulya ya yeeve.

⁹ Ulaalu mmbo shikeiya kyimwi na Yaseri na Shibna, misoru yakwa mmbo ikeepusuka kyimaruma kya Heshboni na Eleale, mashika nkukiitiwa lyingyi mindoro ya ndunda ta fimu fya mareminy-fo fyammamika.

¹⁰ Ifura na mindora fyansarummya kulya nndeny mmbiiri kulya misabibuny nkukyii-fo lyingyi yiimba-fo nta ikapa mindoro-fo. Nkukyii-fo lyingyi ikama sabibu-fo ifura na mindoro ya yuuluula sabibu yammanda nnyikiitiwa lyingyi-fo.

¹¹ Kweekyo, muu wakwa mmbo ukeiiya Moabu sha sese na nrima wakwa kimaruma kya Kir-heresi.

¹² Vandu va Moabu vakeekwaarisa-ruu elyi vefo vasheenda yiinndya iruva lyawo efo ifumbuu mmba ya iterevya mmbashiirikywaa-fo.

¹³ Eti nto mbony Nndumi Iruva aamba, kyeeri kya mapookyony kya Moabu.

¹⁴ Ulaalu Nndumi Iruva mmbo aamba indi, “Ando a myaaka iraru ikeesha, Moabu mmbo imamitwa lla neelyi vandu vawo vakee veengyi, yewo vasheturunyaa ni vaangu na vafwafwa.”