ISAYA 11 - BIBILLYA Mareiyo Meele a Iruva

Umangyi urilalyi

¹ Mmbo kushekaa kumye-fo maa efo ngyeeri ya ufyari lwa Yese; na iramba lyishemyaa miraariny ya vayo.

² Mumuyo wa Nndumi Iruva ushenkayaa; mumuyo wa urango na umanyo, mumuyo wa makusaro mesha na finya, mumuyo wa kilosshyo na yeereya lya yiinndya Nndumi Iruva.

³ Ifura lyakwe ni yeereya lya yiinndya Nndumi Iruva. Nnyasheleta vandu kwa ivalla na miso-fo, nta irummbwa mbony kwa ilatya filya akeeyiita-fo.

⁴ Mmbo asheletaa vandu vaturi kya usumanu lwawo, asheirumbuya vandu vasuri urukeny ndesa kyikwaani. Ashekapa uruka na nsengye wa kana kyakwe, na kwa mumuyo wa firomu fyakwe asherumata weesi.

⁵ Usumanu mmbo lushevaa nkanda wa ifinga kisi kyakwe na wiindi luve ngomita kisiny kyakwe.

⁶ Kite kya ngoroshony mmbo kishekaa ando amwi na yoonri, nyamandu mmbo ishelalaa ando amwi na ngurana ya mburu, ngashe na miiso na ivanda ando amwi, na mwana n-du mmbwe ashevaa mwiisi waawo.

⁷ Ng'umbe na ngare mmbo tilyiiyaa ando amwi na ngashe ta vayo mmbo tishiimuyaa ando amwi na miiso ishelya mare sha ngoleta.

⁸ Mwana n-du mmbo ashetavana yoo mwaangony wa irina lya shoka itiri suumu, kuleefo weeresi nta kindo kimpaana; naakwa avika woko efo oroony lya-vayo.

⁹ Efo ifumbuu yeele lya Iruva nkushevaa-fo maariso nta ukyiva-fo, mashika finya ya imanya Nndumi Iruva, mmbo ishekwaana ulaniny koose. Sheelyi mura waivalyiivalyi yeeveny.

Iwuya lya vandu vakee ushingeny

¹⁰ Kusheesha nkonu ashesaaleeswa mangyi ooka efo ufyariny lwa Yese nave mangyi asheinndywaa ni masanga moose.

¹¹ Elyi nkonu yeto ushefikaa, Nndumi kwa finya ya woko lwakwe mmbo ashesangirya vandu vakwe, valya vesaa kulya Ashuru, Misri, Pathrosi, Esopia, Elimu, Babilony, Hamati na kulya mbaa-mbaa ya yeeve.

¹² Nawe Nndumi Iruva ashesaamisaa bendera uwe na vandu va masanga woose valollye sheelyi vana va Israeli, valya veenyanyakye ulaniny na yiipalwa, vakeesangirywa amwi wooka taari toose yiinya ta uruka.

¹³ Kusu-kusu na finying'u nnang'ani ya Efraimu na Yuda mmbo fishesyaa na kiduva mmbo kishemandaa nnang'ani yaawo.

¹⁴ Woose mmbo vashekulungaa vakape Vafilisti vakee taari ya nkwaany amwi na valya vakee taari ya ngama vashitirwa nrapu, Vamoabi na Vaedomu mmbo vashevingwaa yoo Vaamoni mmbo vashevainndyaa.

¹⁵ Nndumi Iruva mmbo asheumisaa yeeve yaa Shamu, mwi wa kirangasi usheumisaa mura wa Eufrate, nato ushekwaava ngyusoka mfungare na vandu vashekillya ando koomu na marende.

¹⁶ Nalyo kusheva-u shia ing'ani yuuka Ashuru ya vandu vakwe valya vesaa-fo, shia ilya ya Vaisraeli kyeeri kilya wooka Misri.