ISAYA 1 - BIBILLYA Mareiyo Meele a Iruva

¹ Ukisuku lwa Isaya mwana wa Amosi, llukeyaamba findo fyetanyika Yuda na Yerusalemu kyeeri Usia, Yotamu, Ahasi na Esekia vekee vamangyi va Yuda.

Iruva Asakira Vandu Vakwe

² Nndumi Iruva aamba, “arannyiny, yeni ngyina! Loota karwi na yewe uruka! Vandu valya vakwa shilevakapannya na ivalela vanshikapa mungo.

³ Kyoongo mmbo kyiishi muni kyoongo, na nshungu ukamanya yeto mwiiniinga kyeelya; indi Israeli mmbeeshi-fo, vandu vakwa mmbakeemanya tere-fo.”

⁴ Yeni Isanga ilyang'a! Vandu valyamari va ngyeeri ya vandu valyang'a, vana mutanaa makasha! Mulelema Nndumi Iruva waany, mukeenyala yeto Mweele nnu, mukankapa mungo, Nndumi Iruva wa Israeli.

⁵ Nkyikyi elyi mwiifo mwiisakyaa na yeengera ishikapa mungo? Nrwe moose mmbo ulwee na nrima ukarovywa mfyoova.

⁶ Kupooka uvayo kundefika nrweny wo ando mwiili moose mmbo ulwee, wo ando mmbo samu ikeeshoshoka, kuleefo mwiifinga fishavere efyo nta mwiifyaamba mafura.

⁷ Uruka lukaaluwa marama lulatiri vandu, miri ikakorwa na muro na kulya kwany kukasamya-fo vandu vengyi uruka lwany lukamamitwa.

⁸ Muri wa Yerusalemu ukarewa-u sha nndu asomuka iviony lyakwe kundo aremmyi matongoryo, kukarewa marama.

⁹ Kukooye kulaore Nndumi Iruva wa Matorito alelureeya-fo maata, mmbo lweeva sha Sodoma, neevaka Gomora.

¹⁰ Arannyiny irero lya Nndumi Iruva, yeni vashilyi va Sodoma. Looteny maarwi any mwaarannyi miloshye ya Iruva, eni vandu va Gomora.

¹¹ Nndumi Iruva mmbo aamba: “Wiingyi lwa firaso fyany kwakwa nkyokyi? Mmbo shilemmbwarya firaso fyeekora fimaaye fya ndafu na firaso fyiingyi fya moonri any alatiri mfere, nshikunndye samu ya shau ao suva ao ndafu-fo.

¹² Nkyokyi mukesheengye! Mmbi yeto amuninga muumu weesha na ivavara yefo yeemeny kwakwa?

¹³ Mulashe lyingyi kwakwa isheengye firaso fyany-fo, nshikunndye ubani-fo. Lakaniny na sukukuu ta mwiiri mwiiya na sukukuu ta Sabato, nta ikwaanu lya mwiinndye-fo, mashika nshikunndye mwiinndye ukensasande na ulyamari-fo.

¹⁴ Mmbo shisuuye sukukuu tany ta mwiiri mwiiya, findo efyo mmbo nrima wakwa ufisuuye. Fikashirovya nrima wakwa, fikashiniinga maariso muuny wakwa.

¹⁵ Kyeeri mushoorwa maako any mwiishiterevaa mmbo shimusurumaa kisangu kyakwa. Naakwa mwashitereva kyi-kwi nshimwaarannyaa-fo, mashika maako any mmbo akeefwaama samu.

¹⁶ Kusangyeny mukakwiilyisa muveni! Lakaneny na efyo fya ulyamari usanguny lwakwa, nta mulatani lyingyi ulyamari.

¹⁷ Kulosheny itana mesha, kundeny fya usumanu, reny isarya vandu mutarami vana va ngwera ikapannya nka wa ding'u.”

¹⁸ Nndumi Iruva aamba, “Oshony, lureryani naakwa ulyamari lwafo lwadodora dawa mmbo lushevaa waa pyany sha kyaamwi, naakwa lwadodora mmbo lushefwanaa sha pafta.

¹⁹ Kwakooya kwakunyiisa na yiirikya mmbo kushelyaa mesha a ulana.

²⁰ Indi kwakooya kwalema neekurosa, mmbo kushewaawa na usu. Ni Yeny Nndumi Iruva shaamba.”

Muri uraaye ulyamari

²¹ Muri ulya wekee nsha indo, ulaalu wammaluka isonga, kweiishwe usumanu na wiitanu ulaalu kwammaluka kwa vaala shya.

²² Fesa yaany yammaluka kirashi na mfinyu mweetiri ukavikwa mura.

²³ Vasongoru vany vakakulunga na manyinyi vakaakana nawo. Wo umwi kakunda iwarya findo fya kisurukumu, neetereva findo fya pya. Mmbakekyikapannya ngwera nta vaka va ding'u-fo.

²⁴ Kweekyo, Nndumi, Nndumi Iruva wa matorito, muni finya wa Israeli aamba, “Ni kuti shivapusuye nyashi yakwa, vakiduva eva, nta valakiidima-se isalala lyingyi.

²⁵ Mmbo nshoorwa woko lwakwa uwe yaany shimusangye kyirinda ekyo mufwani mwiile pyai sha nndu asinga minya ikeela deny.

²⁶ Shishemuniinga valeti vany sha valya mweetiri llya mbee, amwi na vasongoru veemutetera sha llya kasha. Llyo Yerusalemu ushevaangwa muri wa urilalyi muri wa usumanu.”

²⁷ Sioni mmbo isheturunyaa kwa usumanu lwawo, urilalyi mmbo lukyiraa yevo vakuryaa.

²⁸ Vandu mbafu na valyamari woose mmbo vasherumatwaa na lyimwi, neewo vasheenda kilasha na mavavaso a Iruva woose vashewaawa.

²⁹ Mmbo kishevaa usutu kwany, kimaruma kya mialoni ilya mwekunndye kikailannya na yiinndya maruva engyi.

³⁰ Mmbo mushevakaa mwaloni wakorwa ni mwi na nnda watura mura wa inisa.

³¹ Valya vatiri finya mmbo vashevakaa mare moomu, mashora awo ave sha sise ta muro varumake amwi na mitannyi yaawo nta valalollyaa mwiivatarama.