HOSEA 8 - BIBILLYA Mareiyo Meele a Iruva

Nndumi eesityo-u Israeli kimaruma kya iinndya maruva

¹ Kaba iranda. Ekawo misa mmbo vakeesha sha uviri urukeny lwakwa! Vandu vakwa mmbo valefisha kyaasa kilya shilevika nawo, vakamina na ufundo lwakwa.

² Naakwa vashivaanga Iruva waawo neamba mmbo vakee vandu vakwa neeshimanya,

³ Lyo mmbo valemmyi mesha vakakunda makasha. Kimmba ni indo vasherishiswaa ni misa.

⁴ Vandu vakwa mmbo valekusauya vamangyi wo veni. Vakavika na vasongoru kulore vashivesa. Vakeepoo saabu na fesa vakasongosya-fo mafwanu fikee mfindo fivarumataa wo veni.

⁵ Mmbo shisuuye nawo kya iruva lya saabu lya vandu va Samaria. Shitirwa ni unyafi kimaruma kyawo. Mmbo vashindyaa maruva a wongo fika indii?

⁶ Mwisraeli mwiipasha mmbo alesongosya ifwanu lya kiri: nalyo nshi iruva-fo. Nalyo iruva elyo lya saabu lya Samaria mmbo lyishewunduwaa!

⁷ Wo mmbo vavaaya uraato, lyo vasheilulaa kititasi! Mashika nganu ilaviraa nnyishukaa nswa-fo. Lyo naakwa yuute, vamisa mmbo vesheilulaa-fo.

⁸ Vaisraeli mmbo vammba sha vandu va masanga engyi vakooka-fo vakava sha nungu iparikye!

⁹ Vakava vakaidi sha mishungu ya kasa, vakakweengya shaasa vakundye. Mmbo valeenda Siria vanderuuya-fo ngarami. Vakataa vandu va masanga naambo vavaringe.

¹⁰ Lyo ulaalu mmbo nshevasang'iryaa ando amwi shivakabe. Ni ulaalu indi vashevavywa vafwe, elyi mangyi ya Siaria ashevafotaa.

¹¹ Shaasa veengera fitara fyeerasya naambo vasarywa, niindo vafumbuta ulyamari lwawo!

¹² Mmbo shavareiya mavavaso akwa na ngyufundo shiingyi, lyo vakaamba mfindo fyeny vakamina.

¹³ Mmbo vashuutya firaso fyeeshisha, vakalya nyama eto. Lyo yeny Nndumi Iruva nshisenywa nnyefyo-fo. Mmbo nshengeraa ilola ngyulyamari tawo shivakabe. Mmbo nshevaviraa Misri!

¹⁴ Vandu va Israeli mmbo vatanyi mmba ta kimangyi, lyo vakarekywa Muumbi waawo. Vandu va Yuda nawo mmbo valetana miri miikare. Lyo mmbo nsherikaa muro weekora mmba yeto na miri yaawo.