HOSEA 4 - BIBILLYA Mareiyo Meele a Iruva

Ndumi Iruva asswo kya Israeli

¹ Aranyiny-te, Nndumi Iruva atiri mwaandu na vandu va kunu urukeny, nawe mmbo aamba indi, “Nkwiifo dede nta ikunda kunu urukeny-fo. Nta mmbashilollye yeny Iruva-fo.

² Vakavika fyaasa mmbo vafifisha. Vakaamba wongo, vakawaa, vakaiva, neetuusa. Uravi mmbo lukeengereka tupu, wo nkonu ni ikuwaa tupu.

³ Nkyo uruka mmbo lukeesia, wo kindo kiifo kifwe, mafisi, ndeye naakwa mmakunga.”

Ndumi asswo kya Vakohani

⁴ Nndumi Iruva mmbo aamba, “Kulave nndu asakira vandu nta natire nawo mwaandu-fo. Mwaandu wakwa ni yeny na vakohani.

⁵ Wo nkonu mmbo mweera mbai, nta nkisuku nawe nnyava nta ngwaana-fo. Nkohani kalyamara manyiny, nkisuku mmbo alyamara kio. Mmbo nshekulyamaraa na mau deny.

⁶ Vandu vakwa mmbo vakee vadenge mashika elyi valashiishi. Yeni vakohani mmushiishi-fo, mukalema na ufundo lwakwa, nkyo neeny shamulema yeni, nta vana vany mmbasheva vakohani-fo.

⁷ Shaasa vakohani valeengereka niindo na ulyamari lulefumbuka. Mmbo nshefullwa wiindi lwany luve seko.

⁸ Efo ulyamariny lwa vandu vakwa mfo mwaviiya masimba nawo vakeengera ilyamara kavii kararu.

⁹ Mmbo mushekapwaa kimwi nsi sha wo.

¹⁰ Mushewaryaa waavi lwa firaso lyo mweengere itirwa nshaa. Mmbo vashetuusaa, lyo nta mmbashengerekaa-fo, mashika elyi muleshilema mukasora maruva engyi.”

Nndumi Eesityou Veeindya maruva

¹¹ Nndumi Iruva mmbo aamba indi, “Mfinyo mwiiya kiwo neeto nkuu mmbo wasoka vandu vakwa urango!

¹² Vakaruuya mumuyo wa ukisuku efo findony fyeepasha na maako! Kiri nkyo vai kivavyaa ekyo kivasumanyi imanya! Vanshilema deny. Mmbo vammbaka nka wa shia nawo mmbo vakundye kwa maruva engyi.

¹³ Mmbo vandenta firaso efo mafumbu-u, neefo fidoorony vakakorya-fo firaso, kundo kutiri miri myaasha itiri ifweera isha! Naasa kikavaany vana vany va kika mmbo vava vatuusi na valyi vany vakatuusa.

¹⁴ Lyo nta nshishevakapaa kimaruma kyavayo-fo, mashika naakwa nnyeni mmbo mwasora ngata ya utuusi elyi mwaanga iindya maruva any mukatuusa mfyo firaso fya vandu valaishi Iruva. Kyaaso ekyi mmbo kyamuronga, ‘Vandu valatiri umanyo mmbo vasherumakaa.’

¹⁵ Lyo ra elyi yeni vandu va Israeli mulakutiri neeny, lyo vandu va Yuda valawe ulyamariny sha elo lwany-fo. Muleende Gilgali indeendya-fo-fo na Beth-aveni mularwe nafo-fo. Nta mulavikye-fo Nndumi Iruva fyaasa-fo

¹⁶ Vandu va Israeli mmbo vavakye nshungu kwa ukaidi. A mmbo nshevalelaa inda sha moonri ashiiswaa kyaandany?

¹⁷ Vandu va Israeli mmbo vashillyo mmaruva a wongo. Ra vakae shaasa vakai!

¹⁸ Vakannangwa ni mfinyo mmbo vakushangala utuusiny, vakakureveesa neekusuta wo veni.

¹⁹ Mmbo vashevivitwa ni uraato, vasuke nnu kimaruma kya yuutya maruva a wongo firaso.”