HOSEA 2 - BIBILLYA Mareiyo Meele a Iruva

¹ Nkyo ulaalu vaanga vandu va Israeli, “Vandu va Iruva” na “Vakunde va Iruva.”

Utuusi lwa Israeli

² Vana vakwa tereveny mau, lyo nnyakikee nka wakwa-fo, neeny nshikikee mmi wakwe-fo. Ntereveny nare utuusi lwakwe.

³ Anra nalatana indo mmbo nshemutaa soori shinreu mbereto shallya awonika. Nave sha uruka wuumu, nawaawa nnyura.

⁴ Nshishelyillyaa vana vakwe-fo mashika mmbana va utuusi.

⁵ Maye waawo mmbo aletuusa, katana findo fya usutu, llya aleamba, “Ra shisore vakunde vakwa, mmbo vashiningaa shoonga, na mura, soori na mafura na mfinyo.

⁶ “Neeny mmbo nshendingityaa na uvare lwa miinga, na shia yeemfikya shiiraye.

⁷ Narishye vakunde vakwe lyo nare nalavakooya. Navaruuye navature. Nookefo naambe, ‘Ra shiwuiye mmi ulya wakwe wa mbee, llya shekee kyeni ngota ulaalu.’

⁸ Nta nnyashiirikyaa sheelyi nnyeny shilenniinga nganu, na mfinyo na mafura, na fesa na saabu eto aleutya baali-fo.

⁹ Naasany kyeeri kya yuulula mmbo nshensokaa findo fyakwa, nganu na mfinyu na ruu ta yooka soori shinningye.

¹⁰ Shimwaammbwe soori shinreu ruu mbee ya vakunde vakwe woose, na nkwiifo nndu ashiidimaa imweekya-fo nemwaauwa maakony akwa-fo.

¹¹ Sukukuu takwe toose nshetimaa, suku kuu ta myaaka na miiri, na Sabato tawo, fyoose fishemandaa.

¹² Mmbo nshelyamaraa misabibu na mikuu ya ndunda ilya aleamba ni nkunde wakwe alenniinga. Misabibu yakwe na miri ya ndunda nshefyaallwa ngorosho, mafisi a ngoroshony ashesamya-fo.

¹³ Na kya fyeeri efyo aleshira nshenkaba. Na kya llya alefumbirya Baali uvumba, na yoo alekwaambika na pete maaruny akwe na findo fya wuuru. Yoo ni marero a Nndumi Iruva.”

Ikunda lya Nndumi Iruva kwa vandu Vakwe

¹⁴ Mmbo nshemmbiiraa lyingyi na kasa, shimuute-fo shimuni na marero mafoo.

¹⁵ Shimmbiirye misabibu yakwe na Imungo elyo lya Ukiva lyive ando a ivika nsia.

¹⁶ Nawe nasheshivaanga mmi wakwe-nta kwakwe nshishekivaa sha baali-fo.

¹⁷ Nta nshishekimweekeyaa nasende irina lya baali-fo.

¹⁸ Kyeeri ekyo llyo nshevikaa kyaasa na mafisi moose na ndeye, nafyo nta mfivikaa kiduva na vandu vakwa-fo. Fisha fyoose fya fira mmbo nshefimaa-fo kunu ulaniny, ngyusu na ngyura. Vandu vakwa vakae na ufoo na ifura.

¹⁹ Israeli, mmbo nshekuruyaa kuve nka wakwa, Shive wafo wa nrima deny. Shikoore usaari, waarya, usumanu na ilyillya lyakwa, kuve wakwa llung'anu

²⁰ Mmbo nsheringaa kyaasa kyekwaallwa wakwa Neewe kushiirikye shive Nndumi Iruva wafo.

²¹ Llyo nsharanyaa fiterewo fya vandu vakwa Israeli Sheende mmbwa urukeny,

²² Nalo uruka lweende nganu na misabibu na mafura

²³ Nsheviirya vandu vakwa uruka lwawo vakooye iveswa. Yewo vensuwa shivaore ikunda lyakwa, Na valya kulore vekee vandu vakwa shivaviire kwakwa. Llyo nshaamba, “Yeni mmbandu vakwa,” nawo vaambe, “Yewe ni Iruva weeru.”