HOSEA 14 - BIBILLYA Mareiyo Meele a Iruva

Irero lya Hosea kwa Israeli

¹ Yeni vandu va Israeli, wuyeny kwa Nndumi Iruva waany. Ulyamari lwany llo lulemweengye nsindara mukawa.

² Wuyeny kwa Nndumi Iruva nakyo kiterewo eki kiwe sha kiraso kwakwe. “Lufwaaye ngyulyamari teru kuwarye kiterewo kyeru, neese lushekurumishaa shaasa lulevika kyaasa,

³ Siria nnyishidimaa ilweekya-fo, nta frasi ta fira ntishidimaa iluringa-fo. Nta llukyambaa mafwanu ni Iruva weeru-fo. Woi Nndumi Iruva lyillya yewo valatiri ungyi vambuiyaa.”

Nndumi avika kyaasa kiyya kwa Israeli

⁴ Nndumi Iruva kaamba, “Mmbo nsheviraa vandu vakwa na kwakwa, shivakunde na nrima deny nta nshishekiswaa nawo-fo.

⁵ Kwa Israeli mmbo nshevaa sha mmbwa yakapa ando kuumu. Nawo mmbo vashevaa sha fivaro, miraarii ikutire si deny sha miri ya Lebanon.

⁶ Mmbo vashekaa na muu mwiiya vavake miri ya mafura, vamike sha nsito wa Lebanon

⁷ Mmbo vashewuyaa ikaa uringyiny lwakwa, varemi nganu neevesywa sha nnda wa misabibu. Vamanyike sha mfinyo wa Lebanon.

⁸ Vandu va Israeli mmbashekisoraa maruva a wongo-fo. Mmbo nshevaringaa neerouwa fiterewo fyawo. Mmbo nshevavikyaa nruve vave sha nri ulanaa, shive kimayeny kya mbora tawo.”

Mafurummyony

⁹ A mmbi yeto atiri urango namanye efyo fikee fireiye yaa vafivike nriminy? Shia ta Nndumi Iruva nta usumanu. Na vandu va usumanu mmbo vatisoraa. Lyo valyamari mmbo vateere vakawa-fo.