HOSEA 13 - BIBILLYA Mareiyo Meele a Iruva

Uvingo lwa Ifurummya uwe ya Israeli

¹ Elyo mbee kyeeri vandu va Efraimu valerera, Vaisraeli vengyi mmbo veiryaa. Lyo vandu vakalyamara elyi vaindya Baali, nakyo kiveengye ufu.

² Mmbo veengera ilyamara elyi vasongosya mafwanu a minya vakaiindya mafwanu a fesa, atanwa mmaako a vandu. Nawo vakaamba, “Niingyeny firaso!” Nndu mmbo ashiidimaa inda imiminda ifwanu ifwanu lya shau!

³ Vandu yeva mmbo vasheekaa sha ituu lya ngama elyo lyareka swany kyeeri kya ngama. Ao sha elyi nsu wavivitwa ni uraato.

⁴ Nndumi Iruva mmbo aamba, “Yeny ni Nndumi Iruva wafo, shilekuuta Misri Nkutiri Iruva ungyi kuuta yeny-fo. Nta nkwiifo Mwiikira kuuta yeny-fo.

⁵ Mmbo shilekutetera kulya kasa koomu.

⁶ Lyo kwikyifika urukeny usha, kwawuura, kwakurosa neeshirekywa.

⁷ Ulaalu mmbo nshemulaaya sha miiso. Shivevaka nyamandu shikuvereye yoo shia kushiraa.

⁸ Mmbo shishenyaasyaa sha ngare yareta vana va-vayo, shikuratwe-ratwe. Shive sha miiso shimulye.

⁹ “Eni vandu va Israeli mmbo nshemumamitaa! A mmbi ashemweekyaa?

¹⁰ Mmbo mulekunda muniingwa mangyi neevikywa vasongoru. Yewo mmbo vashidimaa imukira?

¹¹ Mmbo shilemuniinga va-mangyi shiitirwa ni unyafi, shooka-fo shamusoka.

¹² “Ulyamari lwa Israeli na uravi lwakwe lwamfumbuka, nalo lukaumbywa ando amwi.

¹³ Israeli ekee wekaa-u, lyo mmbo akee nrung'ani kavaka mwana amfikya iwonika, lyo nalakunde isomukya.

¹⁴ Nshishekiraa vandu yeva shivaute efo ulaniny lwa vafu-fo, ao efo finyiny ya ufu-fo. Ewe ufu ende ngapo tafo! Ende finya yafo ya urumato, ewe ulana lwa ufu. Nshikilyillyaa vandu eva-fo.

¹⁵ Naakwa Israeli avesywa sha mooro, mmbo nshendee uraato lwa muro luuka taari ya ngameny ya kasa, Lusheumisya ngyusoka na mbora toose. Wo kindo kiiyo kimamike.

¹⁶ Samaria nayo nkuti ikapwa kimaruma kya ishira yeny neeshilema. Vandu vakwe mmbo vamamikyaa fireny, vakoku vavavarywa efo si, na vaka vakufingye vaporomuwa noosu.”