HOSEA 12 - BIBILLYA Mareiyo Meele a Iruva

¹ Wo kindo vandu va Israeli vatana nkonu moose, uka ngama fika nkwaany n'ruu na fyeerumata tupu. Ngata ya ulembi na yaafinya mfyo vakee nafyo. Mmbo veeshana na Siria neekaba mbusha na Misri.

² Nndumi Iruva mmbo atiri mwaandu na vandu va Yuda, na Israeli ishekabwa kimaruma kya efyo vandu vakwe vatana. Mmbo avataiyaa kya mikaaye yaawo.

³ Nkuu waawo Yakobo mmbo alevakyana na mwanamaye Esau, llya kulaore vembonika. Yakobo eeking'ana kavakyana na Iruva.

⁴ Mmbo alevakyana na nsu wa Iruva kammbinga. Keerera katereva mbora. Na alya Bethel Iruva kasheya nkuu weeru Yakobo karera nawe.

⁵ Yeto mmbwe Nndumi Iruva muni finya Nndumi Iruva llyo irina vashembangaa nalyo veemwindyaa.

⁶ Naasany ulaalu, eni va ufyari lwa Yakobo, kusuryeny Iruva waany mumbuiye. Soreny filya amuvia mutani fya ikunda na usumanu, muvevereya Iruva wany na usisiryo namutannyi filya akundye.

Marero engyi a uvingo

⁷ Nndumi Iruva kawuya kaamba, “Vandu va Israeli mmbo vashilemmyi vakavaka Vakanaani Mmbo valemba vandu veshuryanaa nawo-veveesyaa findo na masaa a ulembi

⁸ Vakooka-fo vakaamba, ‘Lwammba masimba, lwankooya mbusha shisha, nta nkwiifo nndu aluvesaa kundo lwauta masaa-fo.’

⁹ Lyo yeny Nndumi Iruva wafo shilekutetera shakuuta Misri, mmbo nshekuviraa kundekaa lyingyi meemeny shaasa kweekai kulya kasa kulore shenkusheyaa.

¹⁰ Yeny mmbo shilerera na vakisuku shawoora findo fiingyi, na wiikimbi lwa ngata shiingyi.”

¹¹ Lyo fika ulaalu maruva a wongo mmbo akeeinndywa kulya Gileadi. Neewo veindya indo nkuti vafwe. Shau kulya Gilgali mmbo tikeshishwa. Lyo fitara efyo fyeerasya mmbo fishevaa mboto ta mawe a mbateny.

¹² Nkuu weeru Yakobo mmbo enderishya Mesopotamia naambo nandewonisa-fo nka. Karundya nndu eeshisaa moonri.

¹³ Nndumi Iruva mmbo aleruma nkisuku nandekira vandu va Israeli venkaa ushingeny Misri nooke-fo navasongoye.

¹⁴ Lyo vandu va Israeli vakafuluta Nndumi Iruva na unyafi nnu. Ni ufu weni luvasumannyi. Nndumi Iruva mmbo ashevakabaa kimaruma kya usutu elo valemweengye.