HOSEA 11 - BIBILLYA Mareiyo Meele a Iruva

Ikunda lya Nndumi Iruva kwa yevo valankundye

¹ Nndumi Iruva mmbo aamba indi, Kyeeri Israeli ekee mwana mmbo shilenkunda shambaanga nauke Misri.

² Shaasa shileengera immbaanga niindo aleengera ikaa kwaasha neeny. Vandu vakwa mmbo valentya Baali firaso fyeekora na muro vakafumbirya maruva a wongo nsu.

³ Lyo ni yeny shiletetera Israeli keedima yeenda, shakamara vandu vakwa na mayi. Lyo mmbashirikyaa sheelyi shilevalela-fo.

⁴ Ni ikunda na usisiryo shilewoomwa nalo na kwakwa Shaveepoo shavavika yaa kipooteny kyakwa, shakwiinyika shavalola.

⁵ Mmbo valelema ishiwuiya, nkyo nkuti vawuye na Misri, na Vasirya vashevashillya.

⁶ Mmbo vashelollyaa fira miriny yaawo, nayo isherua ngiri toose ta miri. Fira mmbo ishelyamaraa vandu vakwa mashika mmbo vatana ekyo kikee kisha misony awo veni.

⁷ Mmbo vakeengera ishira tupu. Numa lyo nkuti vashefwa kimaruma kya iryo elyo lyivarovyaa, lyo nkushekaa-fo mwiwoota-fo.

⁸ “Israeli a niinda nshidimaa ikweera efo? A mmbo nkuraa inda? A nshidimaa ikumamita shaasa shetannya Adima, ao shikutannyi shaasa shetannya Zeboiimu? Nrima wakwa mmbushekeyaa shitani indo-fo Ikunda lyakwa kwafo yewe lyitiri finya nnu,

⁹ Nshishekukapaa kimaruma kya unyafi lwakwa-fo Nshishelyamara Israeli lyingi-fo Kimmba shikee Iruva nta nshi nndu-fo, Yeny, shikee mweele, mmbo shikee neewe Nshikusheyaa na unyafi lwakwa-fo.

¹⁰ “Vandu vakwa vasheshilatyaa elyi nshedinaa sha miiso kwa vakiduva vawo. Mmbo vasheangusyaa ishisora wooka na taari ya nkwaany.

¹¹ Vashe wooka Misri, veerumbukaa sha ndeye, na wooka Siria sha mbeta. Nshevaviira lyingyi kyeny kwawo. Ni yeny Nndumi Iruva shaamba indo.”

Israeli na Yuda vaminwa

¹² Nndumi Iruva kaamba, “Vandu va Israeli mmbo vashilemba na yaamba wongo, nawe Yuda kava erunda kilasha na yeny Iruva Mweele.”