HABAKUKI 3 - BIBILLYA Mareiyo Meele a Iruva

Kiterewo kya Habakuki

¹ Eki n'kiterewo kya nkisuku Habakuki.

² Woi Nndumi Iruva shileeta filya kuletannya masanga, neeny sharerema. Loore lyingyi woi Nndumi Iruva neese lulollye mikonuny yei yeeru. Naakwa kwarooywa ni unyafi woi Nndumi Iruva lulyillye-dwa.

³ Iruva awuya lyingi auka Edomu Iruva mweele asheukaa-se neefo mafumbuny a Paran. Itumbe lyakwe mmbo lyakwaana iruveeny koose na uruka lukaishwa kyaarafumo kyakwe.

⁴ Mmbo asha emikaa sha kimwii kya ukova sa niini mmbo yooka efo wookony lwakwe na mfo wiidimi lwakwe lukusurumyi.

⁵ Nndumi Iruva mmbo aidima ivaanga ndwari ishe na ufu lukasorya.

⁶ Kasyado, uruka lukarerema, katarammbwa miso masanga akasavaa mafumbu maniini akaparika-parika, na fidooro fikasokya nasi, mafumbuny kulya kundo alerua-rua.

⁷ Shilelollya vandu va Kushan vaawukwa, na Vamidian vakarerema.

⁸ A mmira ilekufuluta unyafi-ro Nndumi Iruva? Ao ni yeeve ndesa? Kwasaama frasi kweera uwe mafishiny, nang'u akava llya ikari lyafo kweengye vandu vafo uvingyi.

⁹ Kwadeesya ura lwafo kwaase, kweekeye mife yafo, Kimwii kyafo kikaavanisa ulana nnang'ani kavii.

¹⁰ Kyeeri mafumbu alekulollya mmbo alererema mura nato ukapusuka wuuka nginii-u, Nayo mira ikee si urukeny ikoona, matundulu avayo akaroswa uwe

¹¹ Kyeeri kweekeya mife yafo ikarumbuka, na mafumu afo akamika-mika nkyeere na mwiiri fikasalala shumu.

¹² Kweera kunu ulaniny kwiitirwa ni unyafi kwavavara masanga na finya.

¹³ Mmbo kulesha kushekira vandu vafo Kimaruma kya mangyi kulensauwa. Kwasaara nsongoru wa vandu varavi, kwamamita na vandu vakwe

¹⁴ Mife yafo ikadosha kirongosi wa itorito vakwe ikasha ivakye kititasi ikalufwa-fwala sha llya valefisha kyama imira vakiva.

¹⁵ Mmbo kulevavara yeeve na frasi tafo, na nkuka eto wa mura ukava mavya.

¹⁶ Elyi sheeta efi fyoose mmbo sharerema, firomu fyakwa fikooshana kya weerei. Nato mwiili wakwa ukava nsele-sele na marende akwa akateruka-teruka. Mmbo shimalallyaa sau, shivereye elyo Iruva ashetaiya ewo veelusisya.

¹⁷ Naakwa mmikuu nnyitiri ndunda-fo nta misabibu nnyitiri ndunda-fo naakwa miri ya mafura afwaamaa nnyikee ivika-fo na rema ntitiri fimu-fo

¹⁸ Lyo nkuti shiishwe nsia, mashika elyi Nndumi Iruva akee mwikira wakwa.

¹⁹ Nndumi Iruva meiishillya mmbo ashivangisaa. Na marende akwa kaaninga finya sha Sarya kashivika ando esha efo mafumbuu.