FYAASO 8 - BIBILLYA Mareiyo Meele a Iruva

Uvaango lwa urango usha

¹ Aranyiny! Urango usha akevaanga! Urango akelyeesa unyanga lwakwe!

² Uwe ando a kidooro kufii na shia, Ando a shia ya ntana mmbu ando akuvikye.

³ Kufii na ando mwaango wa yaanga muriny, Ando vandu vaangaa nangu akeevaanga na unyanga waasha,

⁴ “Eni vandu woose, shamuvaanga yeny! Unyanga lwakwa n kimaruma kyany vandu va vandu.

⁵ Eni matondo! Kufundeny iva na urango. Aranyiny na nshushwa eni varung'ani.

⁶ Aranyiny, mashika kindo shamuvia ni kindo kyaantu; Firomuny kyakwa kushukaa-fo ufundo usha.

⁷ Kana kyakwa nkishaamba dede sheni Kindo kyeesi nshikisuuye muny wakwa.

⁸ Kana kyakwa nkashaambaa marero a dede sheni. Ulembi ni kindo kyeesi firomuny fyakwa.

⁹ Kwa nndu eeshi wo kindo kya sa, Kwa nndu atiri urango fyoose ni fya songosiny.

¹⁰ Sauwa ufundo lwakwa ando a fesa, Na irammbwa mbony ando a saabu shisha.

¹¹ Yeny urango usha shitiri uuru uniini ngota wo kindo kisha. Nta kindo kyimwi kiisha kishiidimaa ivakaniswa na yeny-fo.

¹² Yeny urango usha shitiri umanyo. Shitiri urango na utele.

¹³ Iindya Iruva Llimmbi ni isswa wo kindo kiravi. Shisuuye umbafu, ukushobi na mikaaye mikasha.

¹⁴ Shitiri widimi lwa iikimba na urango usha; Shitiri umanyo na shitiri finya.

¹⁵ Kwi ngarami yakwa vamangyi mmbo vashillyaa, Vashilyi vakarummbwa kya usumanu.

¹⁶ Kwi ngarami yakwa vateteri vakashillya, Vaniini na vashilyi va songosiny.

¹⁷ Shikundaa valya vashikundye. Valya vashiruuya na usau vakashiwonisa.

¹⁸ Usimba na usuri n kwakwa fikaa. Masaa a llung'anu na fyeelya.

¹⁹ Ndunda takwa n shimamiri ngota saabu shisha, Mbusha yakwa ikailanya fesa shiingyi!

²⁰ Nsheendaa shieny ya usumanu, Sha sora shia ya songosiny.

²¹ Yeny mmbwe shaallwaa yewo vashikundye masimba, Shaishura shapu mbeshe ta yewo veshikunda.

²² Nndumi Iruva mmbo eshuumba mapokyony a mashora akwe, Elyo kasha nnu kulaore kweifo nta kyindo kyimwi.

²³ Mmbo sheetanwa mapookyony a fyeeri, Shevekaafo kulaore ulana lwemmbeiyo.

²⁴ Mmbo shewonika kulaore yeeve iniini lyenkaafo, Kulaore soka tenruta mira.

²⁵ Kulaore mafumbu emuumbwa, Na fidooro isalala ando avayo, yeny shevekaa-fo

²⁶ Kulaore Iruva emmuumba ulana na minda yakwe, Nta mbekye ta mbee ta kiluulyi kya ulana.

²⁷ Sheifo kyeeri evika-u ngina Na uringiti uwe ya yeeve.

²⁸ Kyeeri etumarisa mafishi iruveeu, Kyeeri eallwa soka ta yeeve shitumari.

²⁹ Kyeeri evikya yeeve nnyanu wa vayo, Mura wa vayo ulakillye ivavaso lyakwe, Kyeeri evika uvasha lwa ulana,

³⁰ Llyo shekee nawe sha mfuru nrango. Shaveva ifura lyakwe wo nkonu, Shafurya mbee yakwe llung'anu.

³¹ Shefurya ulana na yewo vekee-fo, Na isennywa ikaa ando amwi na vandu!

³² Naasa, vanakwa, shaaranyiny, Ngoma valyaa valatya shia takwa.

³³ Aranyiny ufundo muwonise urango usha. Nta mulalemi-fo.

³⁴ Ngoma nndu mwiarannya, Yeto asindaa wo nkonu mbengyeny kwakwa, Alalaa shoovi mwangony kwakwa!

³⁵ Yeto ashiwonisaa yeny awonaa muu Ankoya isarywa ni Nndumi Iruva.

³⁶ Yeto mwishimina akuvavisaa we muni. Woose vashisuuye mmbo vakundye ufu.”