FYAASO 7 - BIBILLYA Mareiyo Meele a Iruva

¹ Mwana-kwa, tira marero akwa, itirimu mavavaso akwa kwafo.

² Latya mavavaso akwa kukaa na muu, Ringa mafundo akwa sha nyinyiri ya iriso lyafo.

³ Afingye mininy tafo, Areiye ngoony yafo.

⁴ Kuvie urango usha, “Yewe ni mfwama,” Na utele, “Yewe ni mbuya yakwa.”

⁵ Fishekuringyaa kwaasha na nka nravi, Fikuturunyaa na marero arolaa a nka muny.

Nka ntuusi

⁶ Nkonu umwi itirisheny lya mmba yakwa Mmbo sheimaiya efo poo

⁷ Shalolya vakoo veengyi varung'ani Na umwi waawo ekee isembo deny.

⁸ Yeto ekeruarua kulya shia ilya. Naasa kawara shia yeendaa na kwa nka ulya.

⁹ Kwekee kyeeri kya nkwaany, Ireema lya kio lyempooka isha.

¹⁰ Paripari nnkoo ulya kakwanannya na nka ulya, Mmbo eree sha isonga, arie shia takwe.

¹¹ Mmbo ekee nka arorongyaa na nriiti, Marende akwe n nnyaimuyaa kyeny fo.

¹² Llya akee shia, llya singireny, Mmikony ya wo shia alaayaa

¹³ Kashingilya nkoo ulya kammiminda Kammbia marero arolaa, kaamba,

¹⁴ “Nkuti shirwaa kiraso kyakwa; Inu llyo shishiinutyaa kyaasa kyakwa.

¹⁵ Llyo kimaruma shasha ikwaambya, Mmbo shankuruuya na sina deny shakukooya.

¹⁶ Mmbo shammaa yaala kitara kyakwa nisha nnu, Na soori tisha tiukye Misri.

¹⁷ Shamfwalya-fo findo fifwaama, nisha nnu, manimani, udi na mdalasini.

¹⁸ Nnde lundelala ando amwi kutani ngama, Lukushukure na ikunda,

¹⁹ Mmi wakwa nnyeefo kyeny-fo, Aleenda kyaaro kya kwaasha.

²⁰ Aleenda na kilula kya fesa, Nnawuyaa uviny-fo.”

²¹ Kamwoomwa na marero meengyi enlelembaa. Nkoo ulya kaviriswa m marero akwe alya arolaa.

²² Naasa kasora nka ulya na kamwi, Sheelyi ng'umbe ishendaa ishishwa, Sheelyi kinamburi kikillyaa nreyyony.

²³ Nnalemanya sheelyi aretaa muu wakwe-fo, Kutani akooya ammba sheelyi adoshwa mfe ngoony yakwe Kava sha ndeye yawarwa ni nsoori.

²⁴ Naasa vanakwa, shaaranyiny; Looteny maarwi mwaaranyi marero akwa.

²⁵ Mulairikye isongoywa ni nka sha yeto-fo. Nta mulaireire mikony yakwe-fo.

²⁶ Mashika ni womi veengyi ammbatuula, Ni veengyi nnu ammbashisha.

²⁷ Mmba yakwe ni shia ya yeenda kwa varumu. Ni ando a iolokya ufuny.