FYAASO 6 - BIBILLYA Mareiyo Meele a Iruva

Mbyaa tingyi iinya

¹ Mwanakwa, kwa kooya kwankuuta iva nngari wa nndu wafo wa nnyanu Kwankooya kwammbika kyaasa kimaruma kya nndu yeto;

² Mmbo kwankufinga na marero afo kumuni, na kyaasa kulevika.

³ Manyany sheelyi mmbo kukee si ya ushilyi lwa uroo! Kya indi mwanakwa, kwankunda ikwa-uwa. Tana indii sora nndu yeto sere kwantereva akuleke.

⁴ Kwiishave kulalekeye miso afo arengeye, Nta kulalale rwe-fo.

⁵ Kuturushwe kwakuuta nsoori yeto, Sheelyi kinamburi ao ndeye yaturunya nsoori wa mwireiya.

⁶ Yewe nndu nroko! A nkye lola sisiri te. Kusare ngata tikaa kukooye iranngwa.

⁷ Sisiri ntitiraa nshilyi fo, nta mangyi fo;

⁸ Indi mmbo tisurumaa shoonga kyeeri kya mwi, Tikasanyirya shoonga kyeeri kya fimu.

⁹ Yewe nroko, mmbo kulala kufike indi? A ni indii kushookyaa rweny?

¹⁰ Mmbo kushaamba, “Ra shilale kinnywa, Ra shirengeye kinnywa A shikushye maako shiimuye kinnywa.”

¹¹ Kyeeri yekyo llyo ungwera lukee kuwoya sha nsoki, Uturi sha veala shia.

¹² Nndu nravi, nndu nalavaa kindo, Mmbo araaraa eereraa marero a mwaalu ing'ana.

¹³ Kasinnya na miso, esinyaa vengyi, Efurua marende, na iolongya vandu na mini yakwe.

¹⁴ Eishwe ulembi, ekusaraa makasha. Mmbo asyaa mwaandu wo ando.

¹⁵ Kyeendwany yefyo renga mmbo imboyaa tiny, Pari pari alamyoo nta nnyakyaa-fo.

¹⁶ Kwiifo findo firindaru Nndumi Iruva afisuuye; Yee, findo mfungare finturwaa:

¹⁷ Miso a ngoo shuu, ulumilwa ulembi, maako awaa vandu valatiri mbese,

¹⁸ ngoo ishooka mitambo Marennde arishya itana fyeesi,

¹⁹ nkurekyi wa wongo afingyaa ungyi urere Na nndu ariingyaa vana va nka.

Wiikimbi lwa utuusi

²⁰ Mwanakwa, tira mavavaso a nde wafo, Nta kularekyo ufundo llwa maye wafo.

²¹ Avike llung'anu ngoony yafo, Kuafingye singony yafo.

²² Mmbo akusongoyaa shia yafo, Akuringe kyeeri kulalaa, muumburane kyeeri kya nsanyiny.

²³ Mashika ivavaso elyi ni taa, na kirengo ekyi ni sa. Wiikimbi elu na ngaa shisha yeluvika shieny ya muu.

²⁴ Akuringaa kwiire kwaasha na nndu nka nravi, Akukiraa na marero arolaa a nka muny

²⁵ Kulalange nka yeto kya usha lwakwe. Kulairikye akuware elyi akukafya miso akwe.

²⁶ Nndu mmbo aretaa kyeelya kyakwe kyeendwa ni nka isonga, indi kwa nka wa nndu ungyi mmbo kuretaa muu wafo moose.

²⁷ Ndesa kushiidimaa ivika muro mbafuny yafo, Na soori tafo tilaya?

²⁸ A ndesa kumanyaa ivaria makaa a muro, Na ngyayo tafo tire tilaya?

²⁹ Ni indo akee nndu alalaa na nka wa nndu ungyi. Yeto moose apanaa nka yeto nnaraa nalaorotwa-fo.

³⁰ Vandu mmbainyalaa nnu nndu aiva mashika a shaa-fo;

³¹ Indi kaworwa nyataa matorito mfungare; Mmbo aningya masaa atiri moose.

³² Nndu nndummi atuusaa nka wa nndu mmbo akee isembo deny, Yeto mmbo akurumata we muni

³³ Mmbo awonisaa ngapo na fyaasha na iilwa; Usutu llumuukaa-fo.

³⁴ Mashika ngoo ya mmi wakwe nshinyaasi nnu deny; Kyeeri ataiyaa kiduva nnyatiri kya illilya-fo.

³⁵ Nyashirikyaa nta kindo kya itawa-fo, Nta iisirwa ngoo ni findo fyafo fya pya-fo.