FYAASO 5 - BIBILLYA Mareiyo Meele a Iruva

Ikwiisa na utuusi

¹ Mwanakwa, arannya ufundo lwakwa; Loota kuri kafo kwaaranya mbyaa.

² Llyo kushiidimaa itirimu utele Na firomu fyafo urango.

³ Kana kya nka nreti katiri marero arolaa sha ukyi Marero asheekaa vyoo sha mafura.

⁴ Kya indi masiiyon a vayo a vavaa nnu deny, Mmoovi sha usu.

⁵ Ngyayo takwe akeenda kwa varumu;

⁶ We nnyakusaraa kya muu fo. Nyisavaa tupu, nta nnyeeshi fo.

⁷ Naasa yeni vana vakwa shaaranyiny, Nta mularekyo marero a kana kyakwa.

⁸ Ira kwaasha nawe! Nta kulaserikye mmba yakwe.

⁹ Kulasheeningya vengyi nnduma wafo, Na variiti myaaka yafo.

¹⁰ Veny valasheekurwaaya masaa afo, Na nrike wafo uirikye mmba ya veny.

¹¹ Numa kusheiya na iting'wa nnu, Kyeeri mwiili wafo ushelyamarikaa.

¹² Elyi kusheambaa, “Shaasa shesuuye ngaa shisha, Na ing'asha ufundo nriminy wakwa.

¹³ Nshearannya unyanga lwa velosha vakwa-fo, Nta ilootya valori vakwa kuri fo.

¹⁴ Ulaalu shikee kufii na imamika deny, Kwaasha na vandu vakwa.”

¹⁵ Nka wafo mmbo avakye usoka lwa mura nsha; Kuniiye mura wa usoka lwafo kumuni.

¹⁶ N kyiki usoka lwafo lutatallywo kwaasha, Na soka tafo efo shia?

¹⁷ Yeto ni wafo kumuni. Nta kulataranyi na vandu vengyi.

¹⁸ Usoka lwafo lluvikywe mbora, Kufurye nka kwemwalyika kwikee nndu nkoo.

¹⁹ Mmbo akee nsha sha suveny. Kasennya sha uruvi Ukundi lwakwe kulufurye wo kyeeri Ikunda lyakwe likumulemule deny.

²⁰ Mwanakwa, a nkyiki kutirwa mfungwa ni nka ntuusi? Nkyiki kukulumbwaa mbafuny ya nka muny?

²¹ Kummbwa shia ta nndu mmbo tisukukye mbee ya Iruva llimbi, We mmbo alolye wo nndu shaasa asheendaa.

²² Nndu nravi mmbo atirwaa ni uravi lwakwe muni; Mmbo atirwaa ni nsoori wa ulyamari lwakwe muni.

²³ Mmbo afwee kya ngaa yakwe sheesi, Kasarumya kimaruma kya ulang'a lwakwe muni.