FYAASO 31 - BIBILLYA Mareiyo Meele a Iruva

Ufundo kwa mangyi

¹ Marero a mangyi Lemueli. Ngyufundo alefundwa m maye.

² Shakuvia inda mwanakwa, Shakuvia inda mwanakwa shikuirye, Shakuvia kyoki yewe shekutereva kwa Iruva.

³ Kulamaye finya tafo vakeny-fo, Kulavaninngye masaa afo yewo velyamara vamangyi.

⁴ Nkivaa-fo woi Lemueli, nkivaa vamangyi ina wari. Nta vaniini ilanga unangwa.

⁵ Vakana mmbo varekkywaa mavavaso, Veemi vandu vatiri ukiva usumanu lwawo.

⁶ Niinga nndu akeefwa kindo kinangaa, Na wari valya varovyo mfyoova nnu.

⁷ Vani varekyo uturi lwawo Valakikummbwe-se ukiva lwawo.

⁸ Indi yewe kuti kurere ando a woose vakee mbimbi; Na iwaannya usumanu lwa woose valya valakuidimmyi.

⁹ Rera kimaruma kyawo na irummbwa kya usumanu, Ringa usumanu lwa ngwera na vaturi.

Nka nsaari

¹⁰ Nka nsaari dede, nkwi awonikaa? Eto atiri usha ngota wo kindo kya uuru uniini.

¹¹ Mmi wakwe mmbo ammbikaa nsia na nrima moose, Kwakwe awonaa mbusha fyeeri fyoose.

¹² Nnyatannya mmi wakwe ukasha ttwa-fo indi mmbo antannyaa mesha fyeeri fyakwe fyoose.

¹³ Mmbo aruuya ruu ta yooka, Na irunda mashora akwe a maako na finya shoose deny.

¹⁴ We mmbo avakkye ngalava ya mbusha; Mmbo eendee shoonga yakwe auta kwaasha.

¹⁵ Mmbo alavaa ikupoo ngama shuru Kadesya shoonga ya mmba yakwe na ivavasya varundi vakwe mashora.

¹⁶ Mmbo akusaraa iura kyaamba, numa kaura, Na irema-fo findo fyakwe fya mbusha na nrike wakwe.

¹⁷ Mmbo akudeesye irunda na finya, Na ikaarisa maako akwe.

¹⁸ Mmbo amanyaa kwakooya mashora akwe atiri mbusha; Naakwa ni kio mmbo arundaa mashora akwe emikkywa ni taa yakwe.

¹⁹ Mmbo aokaa ruu na maako akwe muni, Na kwa mini yakwe muni kaoka soori.

²⁰ Mmbo ashoorrwaa maako akwe kaniinga ngwera findo, Kaorwa maako akwe kaniinga vaturi.

²¹ Nnyeereiyye laura kya va mmba yakwe-fo, mashika yewo va mmba yakwe mmbo varee soori ta finya

²² Mmbo asongosia soori takwe ta yaala. Soori takwe n ta sambarau na ruu ta uuru.

²³ Mmi wakwe mmbo amanyikaa, Kyeeri akee ando amwi na vaniini va uruka.

²⁴ Nka yeto mmbo asongosyaa soori katikumba Mmbo akummbyaa vandu va mbusha ngova ta kisiny.

²⁵ Finya na wiindi nto kirumi kyakwe, mmbo asekaa kyeeri akummbwaa ndesi na nrondo.

²⁶ Mmbo atarammbwaa kana kakwe karera marero a urango usha, Kaolongya vengyi kya usha.

²⁷ Mmbo asalalyaa nisha wo kindo kishuutikaa efo kyeny kwakwe Nta kyeeri kyimwi akaa ruu nalarunda-fo.

²⁸ Vana vakwe mmbo vakupoo vamwaani. Mmi wakwe mmbo eembaa usha lwakwe kanrumisha:

²⁹ Mmi kaamba, “Vaka veengyi mmbo valetana findo fya wende, Indi yewe kwavairya woose.”

³⁰ Ikushela mmbo lulembaa na usha nshi kindo-fo; Indi nndu nka mwiindya ashiitikiswaa.

³¹ Nrike wakwe usumani iindyo. Mashora akwe nkuti naindywa ando koose.