FYAASO 3 - BIBILLYA Mareiyo Meele a Iruva

Ufundo kwa vakoo

¹ Mwanakwa, kularekyo ufundo lwakwa. Indi tira mavavaso akwa na nrima wafo moose,

² Mashika ashekuniingaa mikonu miingyi Muu mwaasha na iviiri.

³ Wiindi na usaari filalakani neewe! Kufifingye singony yafo; Fireiye ngoony yafo.

⁴ Llyo kushiirikywa na iitikiswa mbee ya Iruva na ya vandu.

⁵ Vika Nndumi Iruva nsia na nrima wafo moose; Nta kulavike nsia urango lwafo-fo.

⁶ Manya Iruva mashoreny afo moose, Nawe asheorrwaa miko yafo myoose.

⁷ Kulakulollye yewe kumuni sheelyi kutiri urango-fo; Indya Iruva kukwiise na uravi.

⁸ Nkyo kishevaa nri nyaminy tafo Na kiimurisyo mafueny afo.

⁹ Indya Nndumi Iruva na masaa afo Na fimu fya mbee fya marema afo moose.

¹⁰ Llyo mbeshe tafo tishiishwaa shoonnga, Na mindi yafo iishwe fyeena.

¹¹ Mwanakwa, kulainyale ikoomyo ni Nndumi Iruva Nta kulasue isakirwa mmbwe,

¹² Mashika Iruva llimbi mmbo akyeemyaa ulya ankundye, Sha ekyi ndeye a nndu akyemyaa mwana ankundye.

¹³ Ngoma nndu ammiitumuso urango usha Nndu yeto akooya imanyisywa

¹⁴ Urango usha ni kindo kinuru ngota fesa, Mmbo lutiri mbusha ngota saabu.

¹⁵ Urango usha ni kindo kisha ngota wo kindo kya uuru; Nkwiifo kindo kulangaa kiilanyi-fo.

¹⁶ Woko usha na urango usha lukuwonisya muu mwaasha, Na woko umuso lukuniinge masaa na utore.

¹⁷ Miko yakwe mmbo isenyi nnu, Toose tikasora unapwe.

¹⁸ Urango usha ni nri wa muu kwa yewo woose vammbonisaa; Vakatira ngoma yewo woose vakutiraa nawe.

¹⁹ Na urango usha Nndumi Iruva mmbo evika uvasha lwa ulana; Na urango katumarisa iruveeu.

²⁰ Kwa urango lwakwe soka tikaruka, Na mafishi akaolota laura.

²¹ Mwanakwa, soongya nnu kya urango usha na utele. Kulafire firekye mbee yafo-fo,

²² Nafyo fishekuviiyaa ushu muuny wafo, Na utore usha singony yafo.

²³ Llyo kushiidima yeenda na ufoo Nta kulakapaa urende lwafo.

²⁴ Kwakaa rembo kulatirwaa mbwerei Kwalala kuwonisaa rrwe shisha.

²⁵ Kulaire werei lwa tiny Nta ngapo ya varavi,

²⁶ Ni elyi Nndumi Iruva we aluvikyaa ngarami. Akuturunyaa kulatirwa ni nsoori.

²⁷ Kulaimi nndu akundye weekyi lwafo ngarami Kwakooya kutiri wiidimi lwa itana indo.

²⁸ Kulavie nndu wafo wa nnyanu, “Enda kushe-se ndesi, neewe kweshiidimaa inrouwa inu.”

²⁹ Kulaokye nndu wafo wa nnyanu ntambo, Yeto akee kufii neewe nalatiri werei.

³⁰ Kulasakye na nndu kulaifo kiteve Kwakooya kulaore ankutannya nta kindo.

³¹ Kulalange ngaa ya nndu nriiti; Nta kulasore myeengye yakwe.

³² Mashika vandu veesi Iruva Lyimbi mmbo avasuuye, Indi kavaallwa mbuya takwe valya vakee vasaari.

³³ Nndumi Iruva mmbo adengaa mmba ta varavi, Indi kavikya mbora mmba ta yewo vasaari.

³⁴ We mmbo ainyalaa vandu va kiila, Indi kang'anisa valya vakunyiisye.

³⁵ Vandu vasaari vakooya iindywa Indi varung'ani vashesutwaa!