FYAASO 27 - BIBILLYA Mareiyo Meele a Iruva

¹ Kulakushoppye ndesi, Nkwiishi nkyoki kishutikaa inu kufike ndesi-fo

² Ra vandu vengyi vakuitikise; Ngota kana kafo kumuni!

³ Iwe ni iroo na nsanga kiwo, Indi ngusana ya nrung'ani nshiroo kikailanya.

⁴ Ngoo ni uriiti na unyafi llumamitaa, Indi mmbi ashiidimaa ilimba kififi?

⁵ Nngwaana nndu mwikuikimba vanduny, Ngota mwisuruma ukundi!

⁶ Usakiro lwa mbuya lloora waarya indi kimimindo kya nkiduva ni ulembi.

⁷ Nndu awuti naakwaa ni ukyi mmbo aulemaa, Indi nndu atirwa n shaa, kindo kivavaa kwakwe nkirolaa.

⁸ Nndu arekkye kwaasha na kwakwe, Nsha ndeye irekkye kwaasha na kifuri kya vayo.

⁹ Mafura na mfwaamu wavayo mmbo usennyaa nrima, Indi ukiva llurandwa nrima.

¹⁰ Kularekkyo mbuya tafo nta va ndeye wafo. Kwambwoywa nni renga kularishye kwa mwana mau, Ni kyeni nndu wa nnyanu akee kufii ngota mwanamaye wa nndu akee kwaasha.

¹¹ Tira urango usha mwanakwa, kweengye nrima wakwa ifura! Na yeny nshituraa kyerouwa mwishiutya uvingo-fo.

¹² Nndu nrango mmbo alollya renga kaiyama Indi ntondo we nnyeenda ree kavavyo.

¹³ Nndu kavika kyaasa mbee yafo kakuvika ando a muny, ipoo isara lyakwe; Kuti we nataa siye ando akwe.

¹⁴ Nndu ashiidikiraa nndu wakwe wa nnyanu na unyanga waasha ngama, Kimanyike sheelyi mmbo anndenga!

¹⁵ Nka wa kyooronye wo nkonu Nkyimwi sha marony a mmbwa ashoolokaa lyimwi lyimwi kyeeri kya mmbwa.

¹⁶ Insiika ni kyimwi na isiika urato, Ao itira mafura na woko.

¹⁷ Minya mmbo innwaa minya, Naaki-wo nndu mmbo aloshwaa ni nndu ungyi.

¹⁸ Mwiremya nri wa ndunda mmbo alyee ndunda, Mwifurukannya nndumi wakwe mmbo aniingwaa wiindi.

¹⁹ Shaasa kukulollyaa kisangu kyafo mureny, Ni indo kukwiishi kumuni nriminy.

²⁰ Kwa vafu na umamito mfiwuraa tusu-fo, Nnaakiwo miso a vandu nnyawuura-fo.

²¹ Usha lwa fesa ao saabu mmbo lweeswaa na muro, Na nndu mmbo eswaa mmashora akwe.

²² Naakwa kwakappya nndu nrung'ani kyuuriny amwi na meemba, Urung'ani lwakwe llummukaa-fo.

²³ Lola nisha ironda lyafo, Kulle nisha findo fyafo feevikkya,

²⁴ Mashika usimba llukaa llung'anu-fo, Nta ureto llukaa ngyeeri toose-fo.

²⁵ Kwammaa iruuna usaka na isangyirya, Uta mare fidoorony kyeeri usaka lukemmya lyingyi,

²⁶ Moonri mmbo akuniinga ruu ta isongosya soori, Suvana nato kukumbaa kuure minda;

²⁷ Tifye ikuniinga malela a kuffye yewe na va mmba yafo, Na fishinga fyafo.