FYAASO 25 - BIBILLYA Mareiyo Meele a Iruva

Fyaaso Fya M mwasi Fya Solomoni

¹ Efi nafyo mfyaaso fya mangyi Solomoni vandu va Mangyi Esekia wa Yuda vefireiya.

² Iruva mmbo arumishwaa kwa isuruma mbony Indi mangyi mmbo arumishwaa kwa filya ashoongoyaa.

³ Shaasa tikee kwaasha ngina na waasha lwa yeenda si lwa ulana, Ni indo urango lwa mangyi lukai lulavaa isavaiya.

⁴ Uta findo feesi feseny yafo, Na mfuru akukapyaa fisha.

⁵ Uta vandu varavi mbee ya mangyi, Na umangyi lwakwe lusongovaa luve lwa usumanu.

⁶ Kulakuite-ite kwa mangyi, Nta kulakwaalwe nndu nniini-fo.

⁷ Mashika ni kyeni ivio, osho kunu mbee, Ngota isutwa mbee ya vandu vaniini! Findo kulelollya na miso afo,

⁸ kularishye irwaa ikwaanuny; Mashika kushetanaa inda nkureekyi Ungyi kashealashaa efyo kwaamba.

⁹ Reryaniny na uroo muveni mukakusongosia kwakooya musakkye, Nta nndu ungyi nalamanyi.

¹⁰ Vandu valashemanya sheelyi kwiifo kirisi, valetefuse irina lyafo.

¹¹ Irero lirerwaa kyeeri kisumani mmbo livakkye ureto lwa saabu uwe ya mawe a fesa.

¹² Wikimbi lwa nndu atiri urango usha kwa nndu ashaarannyaa Ni kindo kisha ngota rashi ao kyiiya kisha kya saabu.

¹³ Nrumi nsaari mmbo akurikye ifura lya mwinruma, Sha mura urelelaa kyeeri kya mwi na nrikye elyi vandu vakeeiluula.

¹⁴ Sha elyi mafishi akuumbya kulaifo mmbwa, Niindo akee nndu mwikuitikisaa ininngywa kindo kya pya nalaniingye.

¹⁵ Na usisiryo nshilyi eedimaailelembwa, Ulumi usha llufishaa iffua.

¹⁶ Kwa kooya ukyi lya lwa murina wafo, Kulashe ibelwa kuiraake.

¹⁷ Kulasheenda kwa nndu wafo wa nnyanu wo kyeeri, Kulasheimwarisa nawe nakuswe.

¹⁸ Nndu mwiuta ukureekyi lwa wongo kafingya uroe, Ni nkasha ngota rungu, usu ao mfe nnyaasi.

¹⁹ Ikusirya nndu alavaa kyeeri kya ukiva, Nkyimwi sha iyoo lyiloe ao urende lweerukkye.

²⁰ Iimbya nndu akee nroovye nriminy, Nkyimwi na ikwaammbwa soori kyeeri kya mbeo ao ivika mmbala kyaasheny,

²¹ Nkiduva wafo etirwa nshaa, n niinge kyeelya; Atirwa n nyura, n niinge kyeena

²² Indo llyo kushekooyaa insuta na kamwi Sha makaa a muro nrweny wakwe Nawe Nndumi Iruva akung'anisaa.

²³ Uraato lwa sinde lluendee mmbwa, Ni indo da irera vandu llyendee myaandu!

²⁴ Ni kyeni ikaa mbai uwe ya kai Ngota ikaa kyeny ando amwi na nka va kiberera.

²⁵ Nsha mura urelelaa kwa nndu atirwa n nyura, Nnaakiwo mbony shisha yauka kwaasha.

²⁶ Nndu nsaari ashiirikyaa isora mbony ta nndu nravi, Nkyimwi sha usoka lutefure ao ruva shifolongye.

²⁷ Nshi kindo kisha ilya ukyi lwiingyi nnu-fo; Nta nshikisha ikwita-ita mbee nnu-fo

²⁸ Nndu nalashiidimaa ifweera ngoo yakwe, mmbo avakkye muri ulatiri uringyi uwoywaa ni vakiduva.