FYAASO 24 - BIBILLYA Mareiyo Meele a Iruva

Nrerye wa Ikumi na Kyeenda

¹ Kulalange vandu varavi; Nta kulatingwa ikaa amwi nawo,

² mashika makusaro awo moose ni uwe ya uriiti, Nkwiifo usha nta lumwi lushuuka kaninyy kawo-fo.

Nrerye wa Makumi Avii

³ Mmba mmbo itanwaa na urango Na ivangiswa na utele.

⁴ Kwa umanyo firya fya vayo fikaishurwa Findo fya uuru fisennyi.

Nrerye wa Makumi Avii na Lyimwi

⁵ Iva na urango usha ni kyeni ngota itira finya, Ee, umanyo ngota finya.

⁶ Mashika na usongoru usha kushiidimaa ikapana fira; Kimaruma kya veolonngya veengyi uvingyi lukawonika.

Nrerye wa Makumi Avii na Kavii

⁷ Kwa nrunng'ani urango usha ni kyuumu iimanya. Ando kukee ikwaanu, nnyatarambwaa kana-fo.

Nrerye wa Makumi Avii na Karaaru

⁸ Mwikusara itana maravi wo kyeeri Ashevangwaa nndu nriingyi.

⁹ Uramba nndu nrung'ani akusaraa ni ulyamari; Nndu wa kiila mmbo asuwoo mbwo nndu.

Nrerye wa Makumi Avii na Kaana

¹⁰ Kwamfwa nrima kyeeri kya ukyiva Naasa yewe mmbo kukee nnana deny.

Nrerye wa Makumi Avii na Karaanu

¹¹ Kira nndu akeendewaawa kya ruu;

¹² Kulasheamba numa, “Llulemanya-fo.” Mashika Iruva mwiesa mirima ya vandu alollyaa; We mmbo akweesaa kyuuka na mitanyi yafo.

Nrerye wa Makumi Avii na Karindaru

¹³ Mwanakwa, lya ukyi kimmba ni usha; Irana lya ukyi llirolaa kaniny.

¹⁴ Ni indo lukee urango usha muuny wafo. Kwanluwona kuvaa na nsia nsha, Nta kindo kuvikkye nsia nkifwaa pala-fo.

Nrerye wa Makumi Avii na Mfungare

¹⁵ Kulalaaye sha nravi awoyaa kyeny kwa nndu nsaari. Nta kulakare ilyamara mmba yakwe.

¹⁶ Mashika nndu nsaari mmbo awee keengyi kavekupoo, Indi nndu nravi mmbo amamitwaa nrenga.

Nrerye wa Makumi Avii na Nyanya

¹⁷ Kulakape nndoro elyi nkiduva wafo awa-fo. Kulafure nriminy wafo kyeeri akapa urende lwakwe.

¹⁸ Mashika Nndumi Iruva mwilollya efyo nnyasennywa-fo Kishiidimikaa nare nalamworota.

Nrerye wa Makumi Avii na Kyeenda

¹⁹ Kulasavaa kimaruma kya vetana makasha-fo; Nta kulatirye vandu varavi kififi.

²⁰ Mashika nravi nnyavaa na usha numa-fo; Taa ya muu wakwe mmbo irumywaa.

Nrerye wa Makumi Araaru

²¹ Mwanakwa inndya Nndumi Iruva na itirya mangyi vio, Nta kulatarannyi na valya ve raaraa.

²² Mashika umamito lwawo lluvasheyaa tiny. Nkwiifo nndu eeshi renga vashendee-fo?

Mbyaa Tingi-se

²³ Yeti tikesora yaa-da ni mbyaa ta vandu vatiri urango usha: Ikunndya vandu mirumbuyeny ya myaandu nshi kindo kisha-fo.

²⁴ Mwilotorya nndu atannyi kikasha, Mmbo adengwaa na isuwa ni vandu.

²⁵ Indi veorota varavi vakooya ifura, Na mbora shisha tivasheyaa.

²⁶ Kirouwo kya usumanu Nsha kimimindo kya mbuya.

²⁷ Runda mbele mashora afo poo, Kwadesya wo kindo nndeny, Numa kwatana mmba yafo.

²⁸ Kulafinngye nndu wafo wa nnyanu kindo kya ruu, Nta kulaambe wongo uwe yakwe.

²⁹ Kulaambe, “Mmbo shitanaa shaasa aleshitannya! Ni kuti shitaiye kiduva!”

³⁰ Mmbo shileira kufii na nnda wa nndu nroko; Nnda wa misabibu wa nndu nrung'ani.

³¹ Mmbo shiletingwa ilolya shaasa lyimiyye miinga, Usoka lwa vayo lukasikkya koose, Na isimamba lyakwe lya mawe lliwoiye si.

³² Shalola, shakusara, Numa shawona ufundo:

³³ Lala kinnywa-da, rengea-u kinnywa, Lema maako afo kukooye iimuya:

³⁴ Indi kummbwa sheelyi kyeeri kukee rony, Ungwera lwafo mmbo lukeekusheya sha nsoki, Uturi lwafo sha nndu arye fisha.