FYAASO 23 - BIBILLYA Mareiyo Meele a Iruva

Nrerye va Karindaru

¹ Kwakaa rembo ilya na Nshilyi, Kulasherekyo nta kinnywa mmbi kukee nawe.

² Fiisa uroo lwafo, Kwakooya kukee nndu kutewiyo n ndeu.

³ Kulalange shoonga takwe shisha Mashika fishiidimaa ikuwara.

Nrerye wa mfungare

⁴ Kwakooya kukee nndu nsuri, Kulalange nnu iengera masaa-fo?

⁵ Sha ikyafya da masaa mmbo amamikaa, Nnyavee sheelyi amya maaru, Akarumbuka akamaya sha ngoru ng'iniu.

Nrerye wa nyanya

⁶ Kulashelya shoonga ya nndu muumu, Nta kulalange fyeelya fyakwe fisenyi,

⁷ Mashika nriminy wakwe mmbo akee iekena kindo kwalya. Akuvia, “Kuliiye, kuniiye!” Indi ngoony yakwe nnyariani neewe-fo.

⁸ Nkuti kusheraaka; Fyaanu fyafo fyoose fishefwaa ruu.

Nrerye va Kyeenda

⁹ Kulasherera mbony yafo mbee ya nrung'ani, Mashika asheing'ashaa urango lwafo usha.

Nrerye wa Ikumi

¹⁰ Kulakillye nnyanu wa kasha Nta kulawaanyi nnda wa vana va ngwera,

¹¹ mashika Iruva Nkira waawo atiri finya. Nawe ashevaviyyaa ngaya.

Nrerye wa Ikumi na Lyimwi

¹² Runda na a urango lwafo ilatya ngyufundo; Loota maarwi afo iarannya umanyo.

Nrerye va Ikumi na Kavii

¹³ Kulare ikyemya mwana. Kwankapa mbiiri nnyafwaa-fo.

¹⁴ Kwansaara mbiiri, Mmbo kunkiraa muu wakwe na kwa warumu.

Nrerye wa Ikumi na Karaaru

¹⁵ Mwanakwa, nrima wafo ukammba nrango Ngoo yakwa neeny ishetiraa ifura.

¹⁶ Ngoo yakwa ishekyesaa, Kyeeri kana kafo karera marero akwaani

Nrerye wa Ikumi na Kaana

¹⁷ Ngoo yafo ilalange vandu valyamari, Indi engera iva mwiinndya Nndumi Iruva mikonu myoose.

¹⁸ Nkya dede kwiifo ndesi ya llung'anu, Nta nsia wafo mmbufwaa ruu-fo.

Nrerye wa Ikumi na Karaanu

¹⁹ Arannya mwanakwa, kutire urango usha Soongya deny shaasa kukai.

²⁰ Kulasheeva umwi wa venangwa mmbwari, Nta vaafu lwa nyama,

²¹ mashika vanangwa na vaafu mmbo vashiinukya iva ngwera, mwisinda erengeaa asheraa firami.

Nrerye wa Ikumi na Karindaru

²² Arannya ndoo akuirye, Nta kulainyale mau kammikwa.

²³ Ura dede nta kulaikumbe; Ura urango usha, ufundo na utele.

²⁴ Ndeye wa mwana nsaari ashevaa mwifura. Mwiira mwana atiri urango usha ashemfuryaa.

²⁵ Furisa ndoo na mau! Mau mwikwiira nafure.

Nrerye wa Ikumi na Mfungare

²⁶ Mwanakwa, shaarannya na nshushwa. Warya ngaa ya muu wakwa.

²⁷ Isonga ni irina yaasha lya iwara vandu; Nka muny mmbo avakkye kirori kisiise.

²⁸ We mmbo alaayaa sha veala shya, Mmbo alembaa womi veengyi itura usaari.

Nrerye wa Ikumi na Nyanya

²⁹ Mmbaki vakee ffwa? Mmbaki vawoywaa mfyoova? Mmbaki vatiri myaandu? Mmbaki vatiri nndiiyo? Mmbaki vatiri fyaasha filatiri kimaruma? Mmbaki vatiri miso adodorye?

³⁰ M mbalya valalakanaa waryiny, Valya valalaa shoowi ishosha wari nsha.

³¹ Kulalange wari kimaruma kya fwana ya vayo, Nta kwakooya ukemika mika upateny, Na isoka vyaa kyeeri kukeena.

³² Masiiyo a vayo mmbo umaara sha shoka; Ukaasa sha shoka itiri kireeyo.

³³ Miso afo ashellaa ng'alu ng'alu, Ngoo yafo isheutaa findo firavi.

³⁴ Kushevaa sha nndu mwilala n nang'ani ya yeeve, Sha nndu mwilala uwe ya ngo ya ngalava.

³⁵ Kushaambaa, “Mmbo valeshisaara nta nshilevavio-fo, Vakashikapa nta n shilemanya-fo. Ni indii shikupoo lyingyi? Ra shiruuye kyeena kingyi te?”