FYAASO 22 - BIBILLYA Mareiyo Meele a Iruva

¹ Ni kyeni iva na ngaa shisha ngota masaa meengyi.

² Masimba na ngwera mmbo vakuwakye kindony kyimwi: Nndumi mmbwe muumbi waao woose.

³ Nndu wa waarya nnyalolyaa ukasha kaiyama; indi matondo ng'u nyaserikyaa akavonisa ngapo.

⁴ Indya Nndumi, kunyiise; mmbo kuvessyoo, kwiindyo na muu mwaasha.

⁵ Shia ya varavi iishwe miinga na mireiyo; mwikunda ikira muu wakwe ashiiyamaa.

⁶ Lela mwana ngaa shisha, nawe nnyasherekywa-fo kutani avaa nndu nkuu.

⁷ Nndu isimba mmbo ashilyaa ngwera, mwiakkwa ni ishinga lya mwiakuya.

⁸ Mwiilanga ilamya masaa a vandu ashewoyoo nrenga, wiidimi lwakwe lwa itana makasha lushefishwaa.

⁹ Nndu atiri maako a iwarya vandu ashevikywa mbora, mashika elyi aavia ngwera shoonga takwe.

¹⁰ Umbuta nndu atiri kiila na mwaandu usiaa, yaararo na firumu-o.

¹¹ Nndu nsaari mmbo areraa marero mesha kava mbuya ya mangyi.

¹² Nndumi Iruva mmbo aringaa kisomyi kya dede, indi kasarya marero a varavi.

¹³ Nndu nroko mmbo aamba, “Nshiidimaa isomuka boo-fo kwiifo miiso mmbo ishiwaa!”

¹⁴ Kana ka ntuusi ni irina yaasha, nndu asuuyo ni Nndumi Iruva ashewaa-fo.

¹⁵ Mwana mmbo alangaa mbony ta urung'ani ngoony yakwe, indi umbiiri lwa wiikimbi lusheuta-fo urung'ani yelo.

¹⁶ Mwilamya ngwera ashemwekaa navesyo numa mwiniinga masimba findo fya pya asheindukyaa iva ngwera.

Mirerye ya varango makumi araru

¹⁷ Loota kuri kuaranyi mareroa yevo vatira urango usha; olonngya ngoo yafo kumanyi miloshe yakwa.

¹⁸ Yewe kushefuraa kwakooya kwaavika nrimin wafo, na ikwiishiwira wo kyeeri.

¹⁹ Nndu shilangye ilosha inu ni yewe, naambo ikusirya lyafo lyive kwa Nndumi Iruva.

²⁰ Shankureiya mbyaa makumi araru, mbyaa ta wiikimbi na umanyo.

²¹ Naambo nkuloshe fya usumanu na dede; Na nndu kankuvesa kuwoni kindo kunrouwaa kya usumanu.

Nrerye wa mbee

²² Kulalamyi ngwera mashika elyi akee ngwera-fo, Nta kulaimi nndu nalatiri kindo usumanu lwakwe-fo.

²³ Mashika Nndumi Iruva ashevataramaa. Na ivasoka muu valya vevalamyaa.

Nrerye va Kavii

²⁴ Kulatire mbuya na nndu atiri unyafi, Nta kularwe na mwirooywa nnu nngoo,

²⁵ Naambo kulasheisora ngaa yakwe, Kuwarwa ni nreyyo.

Nrerye wa kararu

²⁶ Kulasheva umwi wa vevika kyaasa, Vandu vekuvikya veelyaa sye.

²⁷ Kwakooya kulatiri kindo kyetaa, Naakwaa ni kiri kyafo kushesokwaa.

Nrerye va Kaana

²⁸ Kulakillye nnyanu wa kasha, Wevikwa mmbakuu.

Nrerye wa karaanu

²⁹ Ndesa eefo nndu atiri umanyo mashoreny akwe? Yeto asherundyaa vamangyi; Nnasherundyaa vandu valavaa-fo.