FYAASO 21 - BIBILLYA Mareiyo Meele a Iruva

¹ Makusaro a mangyi mmbo avakkye mura ushekaa; Nndumi Iruva mmbo auteteraa wo kundo akundye.

² Mitannnye ya nndu ni songosiny misony akwe, Indi Nndumi Iruva mmbo aesaa mirima.

³ Itana mashora mesha na a songosiny, Mmbo fisenyaa Nndumi Iruva ngota firaso.

⁴ Miso a ngoo shuu na nrima va ukushobi, Mmbo fyoora deny ulyamari lwa nravi.

⁵ Vika uramba usha kuvonise masaa meengyi, Indi kwarunda kwishuung'anaa nkuvonisaa nta kyeni-fo.

⁶ Masaa awonikaa kwa ulembi Ni nsu ushiira na nsoori wa ufu.

⁷ Uriiti lwa valyamari mmbo lwavamamitya kwaasha, Mashika elyi vakeelema itana fya usumanu.

⁸ Shia ya valyamari mmbo irekye kulu; Indi meengye ya nndu nsaari mmbo yoorokkye.

⁹ Ni kyeni ikaa kai ka mmba, Ngota ikaa poo na nka wa kyaanu.

¹⁰ Kindo nndu nkasha alangye itana ni uravi; Naakwaa nkwa nndu wakwe wa nnyanu nnyatiri ilyilya-fo.

¹¹ Kwalosha nndu mpalolo, ntondo mmbo awona urango; Kwalosha nndu ndango mmbo akooya irango mmwasi.

¹² Iruva nsaari eeshi findo varavi vatanaa efo poo kwawo; Nawe ashevatulaa na ivamamita.

¹³ Nndu alema yaaranya kiyyo kya ngwera, Nawe nta nnashearannywaa nkonu aruuya ngarami-fo.

¹⁴ Simbo ya pya mmbo ifweerisaa Unyafi; Kindo nndu aningwa kya pya kikee kisurumyi mmbo kifweraa unyafi.

¹⁵ Usumanu lukansorwa vandu vesha mmbo vafuraa, Indi valyamari mmbo valollya ukasha.

¹⁶ Mwiraaraa kwaasha na shia ya urango Mmbo amatukkya ammbwa ando a vafu.

¹⁷ Mwilanga unangwa mmbo avaa ngwera; Nndu akusaraa ilya na ina tupu ashevaa ngwera.

¹⁸ Valyamari mmbo vakweengye ngapo veni, Veekulumbaa na vandu vasaari.

¹⁹ Ni kyeni ikaa kasa nng'alo, Ngota ikaa na nka ntariti ashaatarisaa.

²⁰ Kyeny kwa nndu ntele nkwiifo masaa a uuru, Indi nrung'ani mmbo ararata masaa moose.

²¹ Mwiinanavya usumanu na ilyilya, mmbo awonaa muu mwaasha na iindywa.

²² Nndu atiri urango usha mmbo ashiidimaa ikamara mifungwa muriny utiri finya Na iwunndwa turuve vativikye nsia.

²³ Nndu aringa kana kakwe na ulumi lwakwe, mmbo aiyamaa renga.

²⁴ Nndu atiri ukushombi ni nndu wa kiila; Na ngaa yakwe mmbo iishwe ukushombi lwa utiilyi lwakwe.

²⁵ Nndu nroko mmbo afwee kulaore awona nta kindo kyimwi alanngye, Mashika maako akwe a mfile nnyakunndye irunda mashora-fo.

²⁶ Nsanyiny moose nravi nnyalangaa iwona kindo, indi nndu nsaari mmbo aniingyaa, lyingyi na lyingyi maako a ukundi.

²⁷ Kiraso kya nndu nravi ni kindo kya ituurwa, ni kituurwa mmwasi kanniingya na ngoo shuu.

²⁸ Nkureekyi wa wongo amamikaa, Indi mwii-itumuso marero akwe mmbo akaa llung'anu.

²⁹ Nndu nravi mmbo akwaallwaa nkaari, indi nndu nsaari mmbo arundaa wo kindo kikasongova.

³⁰ Nkwiifo urango usha, umanyo nta makusaro moose a nndu, Ashiidimaa ivinga Nndumi Iruva-fo.

³¹ Frasi nnyidesywa kwa fira, indi uvingi mmbo llukaa kwa Nndumi Iruva.