FYAASO 20 - BIBILLYA Mareiyo Meele a Iruva

¹ Wari mmbweendee kinyala; na unangwa lukaende mwaandu. Yeto moose asennyo nto nnyatiri urango usha fo.

² Unyafi unyaasi lwa manngyi n sha miiso idinaa; Mwinrosya unyafi mmbo akee yaatarisa muu wakwe.

³ Nkindo kya itumbe iiyama mwaandu; Varung'ani mmbo vasakkyaa.

⁴ Nndu nroko nnyarema kyeeri kya irema-fo Kyeeri kya iilula mmbo aruuya nalawoni kindo tusu.

⁵ Makusaro a nndu mmbo akusurumyi sha uroo lwa mura, Indi nndu ntele eeshi iuraa.

⁶ Vandu veengyi mmbo vakushopaa iva vasaari, Indi atiri usumanu lwa dede awonikaa-kwi?

⁷ Nndu nsumanu kakaa kwa woorotu Vana vakwe ashevara-u mmbo vawikywa mbora.

⁸ Mangyi nsaari kyeeri akee rembo irummbwa mwaandu, Mmbo alollyaa uravi loose na miso akwe.

⁹ A mmbi akara yaamba, ngoo yakwa ikee sheele; Yeny nshiilye peru nshitiri ulyamari fo?

¹⁰ Mesa ya yeesya ya ulembi na fyeeso fya ilemba Fyoose Nndumi Iruva mmbo afisuuye.

¹¹ Naakwaa ni mwana mmbo amanyikaa kyeendwa ni mitannye yakwe, Kwakooya ngaa yakwe nshisha na ya usaari.

¹² Kuri kashiitaa na iriso lyilollyaa, Moose e awii ni Nndumi Iruva aumbye,

¹³ Kulakunde ilala rwe-fo, mashika nkuvaa ngwera; Furukana neewe mmbo kuwonaa shoonga shiingyi!

¹⁴ Nkivaafo, nkivaafo, nndu wa mbusha akee ikunung'unaa, indi kammukau kakwiitikisa ammaa yoolotyo wuuru!

¹⁵ Kwiifo saabu na mawe meengyi a uuru unini; Indi kindo kiilannyi wuuru ni marero a urango usha.

¹⁶ Nndu kavika kyaasa mbee yafo ekurekyaa nndu muny ipoo isara lyakwe. Mwaalwe akuute irunda elyi akureekya veny.

¹⁷ Shoonga iwonikaa kwa ulembi nnyirolaa; Indi numa ya vayo mmbo ivee sha nsanga efo kaninyy.

¹⁸ Vonisa makusaro mesha kulyimmyo mbora; Kweekundye ipooka fira nkuti kusoongye nnu nisha.

¹⁹ Nndu wa urere nnatiraa kyama-fo, Kweekyo kwiise na nndu mwirera ree.

²⁰ Mwidenga ndeeye ao maae, Sa ya muu wakwe mmbo irumikaa sha taa ireminy.

²¹ Masaa awonikye swany swany mapookyony, Nnyavaa a mbora mafurumyon-fo.

²² Kulasheyaamba “Nkuti shitaiye ukasha shiletanywa.” Kusirye Nndumi nawe akutaramaa.

²³ Mesa a yeesa a ulembi Nndumi Iruva mmbo asuuye; Na fyeeso filakee fya usumanu ni kindo kyikasha.

²⁴ Nndumi mmbwe atetera myeengye yeru, Nndu wa vandu ashiidimaa inda imanya shia ashiiraa?

²⁵ Ni kindo kyeesi yaamba kya uresi, Kulavike kyaasa iniingya Iruva kindo kulaore kwansoongya nisha, Numa kushepooka iting'wa ni kyaasa kyafo.

²⁶ Mangyi nrango mmbo alolaa nndu yeto atana uravi, Kanniinga ngapo kuleefo illyilya.

²⁷ Nrima va nndu ni taa ya Nndumi Iruva, Mmbo aweesaa kalollya paa vo kindo kiifo.

²⁸ Usha na usaari mfyo firingaa mangyi; Ushilyi lwakwe lukatumariswa ni usaari.

²⁹ Itumbe lya ukoo ni finya tawo; Na usha lwa umiku ni myaasa ya ukuu

³⁰ Ngapo tivavisaa ni nri wa yuuta uravi; Mbiiri tivavaa mmbo tisangyaa muu deny.