FYAASO 17 - BIBILLYA Mareiyo Meele a Iruva

¹ Ni kyeni mmba ilatiri nta kiroora na unapwe Ngota ifura lyikee mmba ya myaandu.

² Ishinga litiri urango llishiipoo mwaanya wa mwana nrung'ani Avonisaa ding'u amwi na va mmba yeyo.

³ Usha lwa saabu ao fesa mmbo lweeswaa na muro, Indi Nndumi Iruva mmbwe esaa mirima ya vandu.

⁴ Mwitana maravi nnyalootya kuri marero makasha; Yeto mwiyaamba wongo nnyalotya kuri marero a ulembi.

⁵ Mwiinyala ngwera nnyakee yaarara muumbi wake; Mwifurya ngatara kuti naorotwa

⁶ Vamiku mmbo valolyaa itumbe kya vashuku vawo; Kimwi na vana vakalollya va ndeye na va maye itumbe.

⁷ Marero mesha nnyaukaa kaninyi kya nrung'ani-fo; Na marero a wongo kaninyy kya nsongoru.

⁸ Findo fya kisurukumu nsha iwe lya wauru uniini misony a-yeto akeeninngya; Na wo ando ashendaa mmbo avesywaa.

⁹ Mwisarya vandu nnyakooya mbuya; Indi mwikumbura vandu siye tawo nnyaumbutaa mbuya.

¹⁰ Wikiimbi kwa nndu nrango lutiri muye Ngota ngapo iyana kwa nrung'ani.

¹¹ Kindo nndu nravi atana ni weesi, Nrumi nnyaasi arumwaa kwakwe.

¹² Ni kyeni ikwanannya na nyamandu ya kika yasokwa vana va vayo Ngota ikwanannya na nrung'ani efo urung'aniny lwakwe.

¹³ Mwitaiya mesha na makasha, Makasha nnakaa nauke efo kyeny kwakwe-fo.

¹⁴ Issya mwaandu ni kimwi sha idosha iruwa lya mura, Lakana na mwaandu kulaore wanng'ana.

¹⁵ Isarya mwirenga na ikapa nndu nalarengye Nndumi Iruva asuuye.

¹⁶ Nkyiki nrung'ani itira fesa wokony lusha ta yuura urango usha, Nawe muni nalatiri urango?

¹⁷ Mbuya ya dede ni mbuya ya mikonu myoose, Mwana maye wa nndu mmbo awonikye naambo naekkye kyeeri kya ukiva.

¹⁸ Nshi kindo kya urango ikureeka, Na iva mwiishi wa nndu ungyifo.

¹⁹ Mwikunda myaandu nnyakundye ulyamari; Mwikwitikisa n nyakekuruuiya umamito.

²⁰ Nndu wa nrima nkasha nnyavesywaa-fo; Na mwirera wongo n nyawoyo nrenga.

²¹ Mwana nrung'ani nting'wa kwa ndeye; Na ndeeye wa nrung'ani nnyatiri ifura fo.

²² Nrima usakukye ni nri, Indi nrima ukunarye mmbufofisaa mwiili.

²³ Nndu nravi mmbo awarya fya mbarya kirisi, naambo narete usumanu.

²⁴ Nndu ntele lango yakwe ni urango usha, Indi nrung'ani mmbo alangaa wo kindo ulaniny.

²⁵ Mwana nrung'ani ntingwa kwa ndeeye Ni kivavo kwa maaye amwiirye.

²⁶ Nshi kisha iipoo kikapa saka kya nndu nalarenngye-fo; Ni kyikasha ikapa nndu nsaari.

²⁷ Nndu nalareraa nnu, mmbo atiri umanyo; Nndu akee do mmbo akee ntele.

²⁸ Naakwa ni nrung'ani kamalallya mmbo alolywaa akee nrango; Kasanndya kana kakwe mmbo alolywaa atiri urango.