FYAASO 16 - BIBILLYA Mareiyo Meele a Iruva

¹ Lushiidimaa deny ivika uramba, Indi mwiinutya ni Nndumi Iruva muni.

² Mitannyi ya nndu nnyivee ya songosiny kwakwe muni, Indi Nndumi Iruva mmbwe eesaa nrima wa nndu.

³ Vika Nndumi Iruva nsia wa mashora afo, Na ngyuramba tafo tisheinukyaa nisha,

⁴ mmbo aumbye wo kindo kimaruma kyakwe, Naakwa ni varavi kimaruma kya nkonu wa urumato.

⁵ Wo nndu atiri ngoo shuu ni kindo Nndumi Iruva asuuye; Ni kya dede nndu wa ngata yeyo nnyaraa nalaorotwa-fo.

⁶ Kya wiindi na usaari nndu mmbo autwaa ulyamari; Kya iindya Nndumi Iruva nndu mmbo aiyamaa uravi.

⁷ Nndumi Iruva kansennywa ni meengye ya nndu, Mmbo aindutaa naakwa mbakiduva vakwe vakava mbuya.

⁸ Ni kyeni masaa maangu a usumanu, Ngota iwona masaa meengyi a ulembi.

⁹ Nndu ashidimaa ivallya uramba lwakwe. Indi Nndumi Iruva mmbwe asongoyaa myeengye wakwe.

¹⁰ Mangyi arumbwaa eesongoywaa ni Iruva; Kyeeri akeerummbwa mwaandu nnyateree-fo.

¹¹ Nndumi Iruva mmbo akundaa kyeeso na mesa a yeesa a usumanu; Mawe moose a mfikony a yeesya ni ishora lyakwe.

¹² Ni kindo kikasha na kamwi mangyi itana uravi, Mashika uvasha lwa ushilyi lwawo ni lwa usumanu.

¹³ Mangyi mmbo akundyaa mwirera kya woorotu; Mmbo akundaa yeto ashaambaa dede.

¹⁴ Unyafi lwa mangyi nsha nrumi wa ufu; Nndu nrango ashelurumyaa.

¹⁵ Kisangu kya mangyi kikammiila kwiifo muu; Usha lwakwe nsha ifishi lya kisye.

¹⁶ Iwonisa urango usha ni mmwasi ya saabu; Iwona urango ni isauwe isha ngota fesa.

¹⁷ Shia ya worotu nnyiiyamaa uravi; Mwiringa shia yakwe mmbo akiraa muu vakwe.

¹⁸ Ngoo shuu n nyisongoyaa urumato; Ukushobi llusongoyaa miwoye.

¹⁹ Ni kyeni itira wiindi na iva nturi Ngota iava na masaa na vatiri ngoo shuu.

²⁰ Mwivalya na ufundo mmbwe avesywa, Ngoma nndu akusirye Nndumi Iruva.

²¹ Nndu atiri urango usha ngoony yakwe avaangwa nndu atiri urango, Irero lyisenyi lyiomwaa vandu,

²² urango usha ni usoka lwa muu kwa yeto alutiri, Indi urung;ani ni ngapo ya varung'ani.

²³ Ngoo ya nndu atiri urango usha nnyo imwidimisya irera na urango; nnyaalua marero akwe akava ashoommwa vandu.

²⁴ Marero mesha nsha ukyi Mmbo arolaa nriminy na iniinga mwiili finya.

²⁵ Nndu ashiidimaa ilollya shia yakwe nnya songosiny, Indi mafurumyony mmbo inrwaa ufuny,

²⁶ isanga lya shoonga lliitikaa nrundi; Mashika shaa yakwe mmbo imwiitikaa irunda.

²⁷ Nndu nravi akudesya itana uravi; Marero akwe mmbo avakye muro wa kipala-paala.

²⁸ Nndu nreti mmbo akwaanisaa mwaandu, Nriingyi mmbo alakanisaa mbuya.

²⁹ Nndu nriiti mmbo atevaa nndu wa nnyanu, Mmboanteteryaa shieny ya uravi.

³⁰ Mwisinnya na iriso kya ntambo nnyadesyaa maravi; Mwimaarya firomu mmbo akudeesye itana maravi.

³¹ Iva na myaasa ya ukuu ni ureto lwa utore; Mmbo ewonikaa kyeendwa ni usaari.

³² Nndu nalakee mwaangu wa iroyo ngoo ni ngoma ngota atiri finya; ashidimaa ishillya nrima vakwe ni kisha ngota atira muri.

³³ Kura nnyikapwa imanya findo fishaa, Indi Nndumi Iruva mmbwe arumbua kya usumanu.