FYAASO 15 - BIBILLYA Mareiyo Meele a Iruva

¹ Irouwa na ufoo mmbo lyifweerisaa unyafi, Indi marero a unyaasi mmbo eengeraa unyafi.

² Ulumi lwa nndu atiri urango usha llukwaanisaa umanyo, Indi vandu varung'ani mmbo veishywe utondo shapu.

³ Miso a Nndumi Iruva mmbo alollyaa wo kindo, Akamanya nndu nsaari na nravi.

⁴ Ulumi ufoo mmapookyony a muu, Indi uravi lwa vayo llufiishaa nrima.

⁵ Nrung'ani mmbo ainyalaa ufundo lwa nde vakwe, Indi mwi-irikya mavavaso atiri urango.

⁶ Mmbeny kwa nndu nsaari nkwiifo masaa meengyi, Indi masaa a varavi mmbo asiyyaa rengeny.

⁷ Kana kya nndu atiri urango usha mmbo kyikwaanisa umanyo; Indi nshi indo ikai mirima ya varung'ani-fo.

⁸ Firaso fya varavi ni weesi mbee ya Nndumi Iruva. Indi kiterewo kya nndu nsaari nkifurisaa Iruva.

⁹ Mikaaye ya vakasha ni uravi mbee ya Nndumi Iruva, Indi Iruva mmbo akundaa vevallya na mbony ta usumanu.

¹⁰ Kwiifo ngapo shuumu kwa yewo valasheenda shaasa kisumani. Yeto moose asuuye iikimbwa mmbo ashefwaa.

¹¹ Kimmba Nndumi Iruva eeshi efyo fikee kwa vafu na kwa varumu, Makusaro a nndu wa vandu ashiidimaa inda ikusuruma mbee yakwe!

¹² Nndu wa kiila nnyakundaa wikimbi-fo, Nta nnyaruuya makusaro a vandu varango tusu-fo.

¹³ Nrima wa ifura mmbo uilisaa kisangu; Indi kivawo nkifishaa nrima.

¹⁴ Nndu ntele mmbo aruuya urango, Indi varung'ani vakakuishura mweelu.

¹⁵ Kwa mwikunarya wo nkonu kwakwe ni nkasha; Indi kwa yeto atiri ifura ni nkonu nniini.

¹⁶ Ni kyeni iva na kyaangu na inndya Nndumi Iruva, Ngota itira masaa meengyi ando amwi na ngatara.

¹⁷ Ni kyeni shoonga ya nkwaany ya kiroora na ukundi, Ngota ilya nyama tivanndye ando amwi na myaandu.

¹⁸ Nndu wa unyafi ukasha mmbo endee mwaandu; Indi nalakee mwaangu irooywa nngoo mmbwe aletaa mwaandu.

¹⁹ Shia ya nndu nroko mmbo iishwe miinga shapu; Indi shia ya nndu nsaari mmbo irambalali ikava niini!

²⁰ Mwana atiri urango usha mmbo eengye nde akwe ifura; Indi yeto akee isembo mmbo ailaa maaye.

²¹ Urung'ani ni ifura kwa nndu nalatiri urango; Indi nndu nrango nnyasauwaa shia ya usumanu.

²² Mashora alatiri veallua mmbo alyamarikaa; Ando veallua veengyi vakai mashora mmbo aviraa.

²³ Kirouwo kya songosiny nkyendee ifura; Irero lisumani kwa kyeeri kya vayo ni kindo kisha deny!

²⁴ Shia ya nndu atiri urango usha nnyeendaa na uwe kundo kukee muu; Naambo naturunye yaanga si kwa varumu.

²⁵ Nndumi Iruva mmbo awundwaa ando vandu variiti vakai, Indi karinga minyanu ya vaka vading'u.

²⁶ Makusaro a vakasha ni uravi mbee ya Nndumi Iruva, Indi marero mesha akanniinga ifura.

²⁷ Mwilanga mbusha ya ulembi mmbo eengye va kyeny kwakwe waatariso, Indi mwisua findo fya ntambo mmbwe akaa na muu.

²⁸ Ngoo ya nndu nsaari mmbo ikusaraa kulaore anrouwo, Indi kana ka nravi kikapusua uravi.

²⁹ Nndumi Iruva akee kwaasha na vandu varavi, Indi akee kufii na vandu vasaari kaveva arannya.

³⁰ Miso a illilya nnyaengye ngoo ifura; Mbony shaantu ikasennya mwiili.

³¹ Nndu mwiarannya wiikyimbi usha, Mmbwe atiri mwaannya nsha mbee ya vandu vatiri urango usha.

³² Yeto asuuye iloshwa mmbo akwiila we muni; Indi mwiirikya wiikimbi mmbo awonisaa urango.

³³ Iindya ni kiloshyo kya urango usha; Kulaore kwammiindyo kuti kuwe nndu mwikunyiisa.