FYAASO 14 - BIBILLYA Mareiyo Meele a Iruva

¹ Nka atiri urango usha mmbo asaleesa ummba lwakwe; Indi nrung'ani kawuundwa na maako akwe muni.

² Nndu nsaari mmbo eendyaa Nndumi Iruva; Indi nreti kainyala Iruva.

³ Nrung'ani mmbo akukapaa muni na irera lyakwe ree, Indi nndu atiri urango usha mmbo aringwaa ni marero akwe.

⁴ Nndu nalatiri ng'umbe ta irema mbeshe yakwe nyiishwaa shoonga-fo Fimu fyiingyi nfiwonikaa kwa nndu atiri ng'umbe ta irema.

⁵ Nkurekyi nsaari mmbo areraa dede; Indi nndu nalakee nsaari mmbo apuswaa wongo.

⁶ Nndu wa kiila nnyaruuya urango usha kya ruu, Indi nndu ntele we kawonisa umanyo.

⁷ Uka ando nndu nrung'ani akai, Mashika yoo akai nkwiiyo irero lya urango usha-fo.

⁸ Urango usha mmbo looraa nndu nrango shia yakwe, Indi urung'ani lwa varung'ani lukavalemba veni.

⁹ Varung'ani mmbo vafuryaa ulyamari, Indi vasaari vakawonisa isaryo ni Iruva.

¹⁰ Ngoo mmbo imanyaa ivavywa lya vayo sheni, Nta nndu muny nnyashiidimaa isanga ifureny lya vayo-fo.

¹¹ Mmba ya nndu nravi nyiwunduwaa, Indi itengo lya mworotu litumariswaa.

¹² Shia kukusarye sheelyi nshisha, Ufishyony lwavayo imanyaa ikurwaa ufuny.

¹³ Ting'wa imanyaa isurumwa ni seko; Numa ya ifura nkishee kiiyo.

¹⁴ Nndu nrekwa mmbo akooya ndunda ta myeengye yakwe, Nawe nndu nsaari awonisaa isina lya mashora akwe.

¹⁵ Nndu nrung'ani nnyairikyaa wo kindo aviywaa, Indi nndu ntele kasoongya.

¹⁶ Nndu atiri urango usha akee mwarya kakkya uravi, indi nrung'ani n nyakwiima-fo nta nnyatiri waarya-fo.

¹⁷ Mwiroywa ni unyafi swany mmbo atanaa fya urung'ani, Indi nndu ntele atiri isisiryo.

¹⁸ Matondo mmbo awaryaa ding'u ya urung'ani, Indi vandu vatele wo vakasimbwa ureto lwa umanyo.

¹⁹ Varavi vashefiryaa vandu vasaari ndi, Vandu vakasha mbee ya mwaango wa vesha.

²⁰ Nndu ngwera mmbo asuwoo naakwani vandu vakwe va nnyanu, Indi nndu isimba atiri, “Mbuya veengyi.”

²¹ Nndu ashiinyalaa nndu wakwe wa nnyanu mmbo akee llyamari; Indi atiri ngoma yeto akee nsaari kwa vangwera.

²² Mwidesya maravi dede akee nrekwa! Vedesya itana mesha vo vavikywaa mbora.

²³ Ikutakura irunda wo ishora mmbo kweende mbusha; Indi marero a ruu mmbo engyee nndu ungwera!

²⁴ Masaa ni ureto lwa itumbe lwa vandu vatiri urango usha; Indi utondo ni fivaro fya varung'ani.

²⁵ Nkureekyi wa dede mmbo akira muu, Indi mwiamba wongo ni nriingyi.

²⁶ Mwiindya Nndumi Iruva mmbo atiri nsia deny; Na vana vakwe vawonaa ikaa na ufoo.

²⁷ Inndya Nndumi Iruva n sha usoka lwa muu; Mmbo kukiraa muu na mireiyo ya ufu.

²⁸ Utore lwa mangyi ni wiingi lwa vandu vakwe, Mangyi nalatiri vandu mmbo avingwaa fireny.

²⁹ Nndu nalakee mwaangu wa unyafi mmbo atiri urango usha, Indi mwiroywa nngoo mmbo akee nrung'ani.

³⁰ Unapwe nriminy lluningaa nndu finya; Indi lango mmbo liporisaa mafua.

³¹ Mwilamya ngwera mmbo akee yarara muumbi wakwe, Indi mwilillya nturi mmbo akee iitikisa Iruva.

³² Nravi mmbo amamitwaa ni mitanyi yakwe ya uravi, Indi nndu nsaari kawona ufoo kyeendwa ni worotu lwakwe.

³³ Urango usha mmbo lukee ngoony ya nndu ntele; Llukoywaa tusu ngoon ya nrung'ani-fo.

³⁴ Usaari llutumarisaa uruka, Indi ulyamari nrenga ya uruka loose.

³⁵ Mangyi mmbo asimbaa ishinga lyirundaa na urango usha, Indi unyafi lwakwe lukawoya veetana fya uravi.