FYAASO 12 - BIBILLYA Mareiyo Meele a Iruva

¹ Nndu akunda wiikyimbi mmbo awonisa urango, indi nalakundye iikimbwa ni nrung'ani.

² Nndu nsaari mmbo alillywa ni Nndumi Iruva; Indi nndu atiri makusaro meesi mmbo adengwa ni Iruva.

³ Nndu nnyasumanaa kya itana uravi-fo Indi nkwiifo kindo kitulaa nndu nsaari-fo.

⁴ Nka nsaari ni ureto lwa utore lwa mmi wakwe, Nka asutaa mmi wakwe mmbo avakkye itiinga mafueny akwe.

⁵ Makusaro a nndu nsaari nnya usumanu, Mirumbuye ya nravi nnya ulembi.

⁶ Marero a varavi nnya lango ya iwaa, Indi marero a vandu vasaari mmbo akiraa veereswa marosho.

⁷ Varavi mmbo vamamitwaa na isarumya deny, Indi ngyeeri ya vandu vasaari mmbo itumariswaa.

⁸ Nndu mmbo eetikiswaa kiinani na urango lwakwe usha. Indi nndu wa makusaro maravi mmbo ainyalwaa.

⁹ Ni kyeni nndu munnyo akwiidimye muni, Ngota nndu mwikwiita mbee neekukundya uniini aturaa kyeelya.

¹⁰ Nndu nsaari mmbo akusaraa kya findo fyakwe fyevikya, Indi kililika kya nravi ni uriiti.

¹¹ Nndu nremi nalakee nroko mmbo atiri shoonga shapu; Indi mwisora mbony tilavaa nnyatiri urango-fo.

¹² Varavi mmbo valangaa ivesyo lyilakee lya usumanu, Indi nndu nsaari mmbo asalalaa na ukaari.

¹³ Nndu nravi mmbo awaawaa mmbongo lwakwe muni, Indi nndu nsaari mmbo ashaashukaa ngatareny.

¹⁴ Nndu mmbo avesyo kyuuka na marero akwe muni, Sheelyi avesywa ni mashora a maako akwe.

¹⁵ Nndu nrung'ani mmbo alollyaa sheelyi shia yakwe nyiorokye, Indi nndu atiri urango usha mmbo aarannyaa kindo avioo.

¹⁶ Ukasha lwa nrung'ani llumanyikaa uviny, Indi nndu eeshi seu mmbo ainyalaa firumu.

¹⁷ Mwirera dede mmbo avikaa ukureekyi lwa dede, Indi nkureekyi wa wongo mmbo aamba fya ulembi.

¹⁸ Marero a mweelu mmbo avyaa sha kyaandu, Indi kindo areraa nndu atiri urango usha mmbo kishiisaa itiinga.

¹⁹ Dede mmbo ikaa llung'anu; Indi wongo llwa kirambo-da.

²⁰ Vekusara maravi mmbo veishwe ulembi ngoony tawo; Indi veelanga mesha mmbo vakooya ifura!

²¹ Vasaari mmbakooywaa ni kindo kivishwa-fo, Indi varavi mmbo veeshywe ukiva

²² Kana karera wongo Nndumi Iruva akisuuye, Indi vandu vasaari ni ifura lwakwe.

²³ Nndu ntele mmbo eeshwe urango usha, Indi varung'ani mmbo vakapaa weele kya urung'ani lwawo.

²⁴ Irunda na nrikye nkuniingaa nndu mwaanya nsha; Indi uroko llwaalwaa nndu ishinga.

²⁵ Werei nriminy lluimaa nndu ifura; Indi irero lyaantu mmbo liniinga nndu waantu.

²⁶ Nndu nsaari mmbo arishaa uravi; indi shia ya varavi mmbo ivaretaa veni.

²⁷ Nndu nroko nnyawonisaa kindo-fo, Indi nndu nalakee nroko mmbo awonisaa.

²⁸ Usaari ni shia ya muu; Indi uravi mmbo lurwaa nndu ufuny.