FYAASO 11 - BIBILLYA Mareiyo Meele a Iruva

¹ Mesa a yeesya a ulembi Nndumi Iruva mmbo asuuye, Indi kyeeso kya usumanu ni ifura lwakwe.

² Ngoo shu na kiila mfiriani, Indi kwa vandu vakunyiisye kwiifo urango usha.

³ Worotu lwa vandu vasaari lluvasongoyaa; Urekwa lwa valembi lluvarumataa.

⁴ Usimba llushekyaa kindo nkonu wa unyafi-fo, Indi usaari llukiraa nndu na ufu.

⁵ Usaari lwa vandu worotu mmbo loorwaa miko yaawo; Indi varavi mbatulwaa ni uravi lwawo.

⁶ Usaari lwa vandu worotu lluvakiraa rengeny; Indi variingyi mbakamarwaa n lango tawo.

⁷ Nravi kamfwa nta kindo avikye nsia-fo, Lango ya nndu alakusirye Iruva n nyisiaa ando a ruu.

⁸ Nndu nsaari mmbo akirwaa ukiveny, Nndu nravi kawa fo ando akwe.

⁹ Nndu alaindyaa Iruva mmbo amamitaa vengyi na kana kakwe; Indi nndu nsaari mmbo akirwaa ni utele lwakwe.

¹⁰ Vandu vasaari vakambesywa mmbo vafuraa, Indi varavi vesarumyaa mmbo vakapaa nndoro.

¹¹ Muri mmbo uvesywa kyeendwa ni vandu vasaari, Indi mmbo urumatwaa nkana ka varavi.

¹² Nndu ashiinyalaa nndu wakwe wa nnyanu ni itondo; Nndu nrango mmbo asya-do.

¹³ Nndu areraa evikaa uriingyi nnyatiri kirisi-fo, Indi nndu nsaari mmbo asiraa mbony.

¹⁴ Ando kulaiyo ushilyi usha uruka mmbo luwee, Indi ando atiri vangari veengyi nkutiri unapwe.

¹⁵ Nndu akurekya muny avonisaa nsindara; Indi nndu asuuye mmbony ta ukureeki ashekaa na unapwe.

¹⁶ Nka nsaari mmbo eetikiswaa, Nndu mmi arundaa mmbwe avee isimba.

¹⁷ Nndu wa maako mmbo avikywaa mbora, Indi nndu nriiti kakuvavisa muni.

¹⁸ Mbusha awonisaa nravi nnya wongo, Indi mwitana fya usumanu akooya mbusha ya dede.

¹⁹ Nndu alanngye iva nsaari akaa na muu, Indi yeto asauwa iva nravi ashefwaa.

²⁰ Vandu va makusaro maravi Nndumi Iruva avasuuye, Indi yewo va mikaaye misha ni ifura lyakwe.

²¹ Kya dede nndu nravi n nyaraa nalaorotwa-fo, Indi vasaari vashekirwaa.

²² Nka nsha alakee nrango, Mmbo avakye rashi ya saabu mmbweny ya kishosho.

²³ Lango ya vasaari ishiinukyaa nisha, Lango ta varavi ntisiiyaa unyafiny.

²⁴ Nndu atiri maako eningya mmbwe avee isimba, Indi nndu nnyuuku mmbo asheengeraa iva ngwera.

²⁵ Nndu mwiambya veny avikywaa mbora; Mwiniinga ungyi mura nawe asheritwaa.

²⁶ Vandu mmbo vadengaa nndu mwisuruma shoonga, Indi vakakunndya mbora yeto avakumbya.

²⁷ Mwiruuya mesha mmbo awonisaa iviiri; Indi mwiruya itana maravi ashevoywaa ni uravi!

²⁸ Nndu avikye masaa akwe nsia ashewaa! Indi nndu nsaari ashekangalaa sha ire ivisi.

²⁹ Mwiwunndwa mmba yakwe akapwaa ni uraato. Nndu nrung'ani ashevaa ishinga lya nndu nrango.

³⁰ Mirunndye ya nndu nsaari mmbo yendee muu, Indi uravi mmbo lusokaa muu.

³¹ Kwakooya vandu vasaari vavonaa mbora yaa urukeny, Ni dede varavi na valyamari kyawo ni kyuumu!