FYAASO 10 - BIBILLYA Mareiyo Meele a Iruva

Fyaaso fya Solomon

¹ Yefi ni fyaaso fya Solomon: Mwana atiri urango usha ni ifura kwa ndeye; Indi mwana nrung'ani ni tingwa kwa maaye.

² Masaa awonika kwa shia ya ulembi nnyamaa kindo-fo, Indi usaari llukiraa nndu na ufu.

³ Nndumi Iruva nnyaree vandu vasaari vawoyo ni shaa-fo Indi mmbo akingyaa lango ta veesi.

⁴ Uroko lluendee ungwera; Indi woko lwa nndu arundaa mashora lukaende usimba.

⁵ Nndu ntele mmbo aumbyaa kyeeri kya fimu; Ilala kyeeri kya iilula ni sony.

⁶ Nndu nsaari mmbo akweengye mbora we muni; Indi kana ka nravi nkiishwe uriiti.

⁷ Ikummbwa vandu vasaari nkyalweengye mbora, Indi varavi mmbarekyekaa deny.

⁸ Nndu atiri urrango usha ngoony yakwe mmbo aindyaa mavavaso, Indi nrung'ani areraa ree asarumyaa.

⁹ Nndu wa ngaa shisha mmbo akaa kippwa, Nlembi muu wakwe awarwaa.

¹⁰ Asinnyaa na ntambo nkasha mmbo eendee ukyiva, Indi yeto aikimbaa na ukaari mmbo eendee unapwe.

¹¹ Kana kya nndu nsaari ni usoka lwa muu; Indi kana kya nndu nravi nkiishwe uriiti.

¹² Kiduva mmbo kyeendee mwaandu, Indi ukundi llusikyaa maravi moose.

¹³ Kaniny ka nndu atiri umanyo nkwiifo urango usha, Indi vandu valatiri urango vakapwaa mbiiri ta mungo.

¹⁴ Vandu vatiri urango usha mmbo vatiri umanyo, Indi verera ree kwa urung'ani mmbo veendee urumato uviny.

¹⁵ Masaa a isimba nnyo turuve yakwe; Ungwera lwa ngwera llumwengyee urumato

¹⁶ Kindo kya pya kya nndu nsaari ni muu, Indi nravi nyeelula ulyamari.

¹⁷ Yeto ashiirikyaa wikimbi mmbo akeenda muuny, Indi mwilema wikimbi mmbo arekye,

¹⁸ nndu asuuye ungyi kirika ni nkunang'ari, Afingyaa ungyi wongo ni nrung'ani.

¹⁹ Ando akee marero meengyi nkuwiikaa-u renga-fo, Indi mwishillya ulumi lwakwe ni nndu ntele.

²⁰ Marero a nndu nsaari avakye fesa shisha, Indi urango lwa nndu nravi llutiri nta mbusha-fo.

²¹ Marero a nndu nsaari nnyaviiya veengyi usha, Varung'ani mmbo vafwee vatura urango

²² Mbora ta iruva Llimbi nto teende iviiri na nso, Itawullya lya nndu wa vandu llyengeraa-u nta kindo-fo.

²³ Kwa nrung'ani itana uravi ni sha kitavanu; Indi vandu vatele mmbo vasennywaa ni urango usha.

²⁴ Kindo nndu nravi aereiye nkyo kinkooyaa, Indi kindo nndu nsaari alangye nkyo awonisaa.

²⁵ Kitita si mmbo kiira na nravi nnyasarumyaa, Indi nndu nsaari mmbo atumariswaa.

²⁶ Shaasa kikee kivawo kaninyy ao nsu misony. Ni indo akee nndu nroko kwa nndumi wakwe.

²⁷ Iindya Nndumi Iruva mmbo lyengeryaa muu wa nndu, Indi myaaka ya nravi ikaangwa.

²⁸ Ivika nsia lya nndu nsaari llisiiya ifureny, Indi lango ya nravi llifwee ruu.

²⁹ Nndumi Iruva n turuve ya woorotu, Indi vetana uravi vasarumyaa.

³⁰ Vandu vasaari mmbo vatiri uringyi; Indi varavi mbakaa urukeny-fo.

³¹ Kana ka nndu nsaari mmbo kareraa marero a urango usha, Indi ulumi lwa nndu nkasha lurumbuywaa kwaasha.

³² Kana ka vandu vasaari mmbo keeshi findo fishiirikkywa Indi kana ka varavi nkareraa maravi.