FYAASO 1 - BIBILLYA Mareiyo Meele a Iruva

Mbusha ya fyaaso

¹ Efyi ni fyaaso fya Solomon mangyi ya Israeli, ekee mwana wa Davidi.

² Fyaaso efyi nfyeninga vandu urango usha na ngaa ya songosiny; fyevaninga vammanyi utele.

³ Fevaninga iva na ngaa ya songosiny, uramba usha, wiitanu usha, usumanu na ikunda kya witanu.

⁴ Fyeniingya matondo urango. Na vandu vakoo waarya na ilala shoovi.

⁵ Nndu nrango nafiite na yeengera umanyo lwakwe, nawe yeto akee ntele awoni isongoywa.

⁶ Nndu namanyi fyaaso na fivakaniso, marero a vandu vatiri urango usha na ngyuraawe tawo.

Wiikimbi kwa Vakoo

⁷ Iindya Nndumi Iruva llo uvasha lwa utele. Kyaindi varung'ani mmbaminaa urango usha na wiindi.

⁸ Mwanakwa, arannya kindo kushongoywaa ni ndoo, Nta kulaipale ufundo lwa mau;

⁹ Mmbo fivaa sha ureto nrweny wafo, Na nse wa utore singony yafo.

¹⁰ Mwanakwa, kulairikye ilembwa ni vandu valyamari-fo.

¹¹ Kyeeri vashaamba, “Ndifo lundelaaya nndu lummbwae; Osho lukape vandu valatiri mbese!

¹² Luvamire sha varumu vekee na muu, Vave sha valya vooloka irininy.

¹³ Lukamare masaa awo a uuru, Mmba teru lutiishure masaa.

¹⁴ Osho akannya neese, Wo kindo luwonisaa lukwaavye.”

¹⁵ Yewe mwanakwa kulatarannyi nawo! Kwiimi urende lwafo kulaende nawo.

¹⁶ Mashika wo vakee irishya itana findo fivishwa. Usau lwawo ni ipuswa samu.

¹⁷ Nsoori ureiywaa ndeye ilollye, Nsoori yeto mmbo wareiywa kya ruu.

¹⁸ Wo mmbo valaaya na ikulyamara wo veni.

¹⁹ Nnyindo tikee shya ta vandu variiti. Uriiti llurumataa muu wa vandu variiti.

Urango Usha Lukevaanga

²⁰ Urango usha lluvaanga na unyanga waasha efo shia niini, Lukalyeesa unyanga efo singireny

²¹ Lluvaanga uwe ya isimamba Llukapaa weele moongony wa muri

²² “Eni varung'ani! Kumandi indii musheengera iva varung'ani? Kumandi indii vandu va kiila vafuryaa kiila kyawo na matondo isua utele?

²³ Aranyiny mavavaso akwa! Shimupusuye makusaro akwa, Shimuvye marero akwa.

²⁴ Kimmba shilemuvaanga, mukalema ishaarannya. Shamusinnya mushe mukalema.

²⁵ Mukaipala kindo shilemuvia kyoose Nta mulairikye kindo shilemwiikimba.

²⁶ Na yeny da shishesekyaa ngatara yaany! Shishemwipalaa elyi muwoyoo mbwerei

²⁷ Kyeeri mushewoyoo mbwerei sha iruruma, Ngatara ishemuwoyaa sha kitita si, Kyeeri ukiwa na ngapo fimuwoyaa.

²⁸ Llyo meendi musheshivaangaa kyaindi nshimuirikaa-fo. Musheshiruuya na sina nta mmushiwonaa-fo.

²⁹ Kimaruma mmbo mulelema utele Nta mulasauwe iindya Nndumi Iruva.

³⁰ Kimmba mulelema makusaro akwa Mukaipala wiikimbii lwakwa loose.

³¹ Naasa mushelyaa ndunda ta ngaa yaany Mushefummbywa ndeu kya ntambo wany muveni.

³² Mashika matondo mmbo akuwaa kya umbafu lwawo Varung'ani mmbo akumamitaa kya ikuvika nsia lyawo.

³³ Kya indi wo nndu asharannya ashekaa kippwa, Ashemalallya sau nta nyashiiryaa ukasha-fo.”