FIIYO 4 - BIBILLYA Mareiyo Meele a Iruva

Yerusalemu immaa Imamitwa

¹ Saabu ilya yeeru yekeemika yammba iturya Na mawe a mmba ya Iruva akanyanyaka efo shieny ta muri

² Vana vakoo va Sioni mmbo veevakye saabu kweru yese Kyeendi ulaalu mmbo vammba sha uteri lwa nungu

³ Kyeendi naakwa mmakitye a ngoroshony, mmbo alelaa vana va vayo Lyo vandu vakwa wo vakavaka nyaa, isuuye kifuri kya vayo.

⁴ Mmbo vara vana vawo vakawaawa nshaa na nyura, vana vakeerevya kyeelya lyo valawonaa mwiivaniinga.

⁵ Vandu valya vekeelya shoonga shisha ngota woose, ulalu mmbo vakefiyya efo shieny ta muri, yewo valeng'annya usimbeny, ulaallu mmbo vakeerorwa fyeelya.

⁶ Vandu vakwa mmbo vakee vakape vakairya valya va Sodoma. valya Iruva alevasheya tiny kavakapa.

⁷ Vana veru vekee va ki-mangyi, valatiri ivara, vaa peru, vakatira finya.

⁸ Ulaalu nnyefo shiyeny ta muri valele valakiishiwa, vakafwana wuu, vakooma pony sha ukwi, ando amwi na maffwa awo.

⁹ Valya valefiyya fireny vakava kyeni ngota valya valefwa numa, yewo mmbo valefwa waarya, vawaawa nshaa elyi valetura shoonga.

¹⁰ Ukiva elo lulesheya vandu vakwa mmbo luleawuta nnu vandu. vaka vakalya vana vawo veni.

¹¹ Nndumi Iruva mmbo aleinutya unyaasi lwakwe kaata muro Sioni, ukamamitya findo fyoose.

¹² Ulaniny koose, vave naakwa ni veeshillya, nkwiifo nndu eeshi sheelyi vakiduva vashidimaa ishingillya Yerusalemu-fo.

¹³ Kyeendi kileidimika indo mashika elyi vakisuku valelyamara na vakohani vakeengye vandu valalyamarye nta kindo vakawaawa.

¹⁴ Vasongoru vawo vakaraaraa efo shiyeny ta muri vekee sha vafu miso, veefwani samu kutani nndu eereya ivaserikya.

¹⁵ Vandu mmbo vevavia, “Kweete, kwete, mmbo mukee vatefusu, Kulashipaani-fo!” Vakeenda efo neefo masangeny valaoni ando kwa iimuya.

¹⁶ Nndumi Iruva nnyalevasara-fo, kavanyanyata. Nnyalesara vakohani nta vasongoru veru-fo

¹⁷ Lukavereya lukaaraa naambo luwoni ngarami, lyo lulaiwoni. Lukavereya lweekkyo ni vandu valashidimaa nta yeekya, lyo ruu-da.

¹⁸ Ate nkiduva mmbo ekelulla-da, nta llweidima isomukya efo shieny ta muri-fo, Mikonu yeeru yemmisya, urumato lweru lwemmaafukya.

¹⁹ Vakiduva mmbo vesha sha uviri, lukarishiswa Vakaluvingya efo fidoorony, vakaluumbutya efo kasa koomu.

²⁰ Mangyi ulya lwembikye nsia mmbo alelasuwa ni nsoori, Neese mmbo lweevikye nsia yoovya kirisheny kyakwe

²¹ Fura yewe ewe Edomu na Usi, kyesa shaasa kushidimaa, Lyo urumato lwafo lukusheyaa, kusuke kwiirewaa mbereto.

²² Ewe mwana wa kyeny Sioni, uravi lwafo lufye. Nndumi Iruva nnyakiluraa-se ushingeny-fo. Lyo ewe Edomu, Nndumi Iruva ashekukapaa, noore paa uravi lwafo.