FIIYO 2 - BIBILLYA Mareiyo Meele a Iruva

Ngapo ya Yerusalemu

¹ Nndumi Iruva mmbo aleengye Sioni ireema kya unyafi lwakwe! Usha elo lwavayo lwa kiiruveeu mmbo alelulyamara. Llya alerooywa ni unyafi, naakwa ni mmba yakwe mmbo aleisama.

² Nndumi Iruva mmbo alera isarya lyakwe, kalyamara uruka lwa Yuda Kasambwa uvaare llwa lweeringitye uruka keengye umangyi elo na vashilyi va-vayo usutu.

³ Kyeendwa ni unyafi lwakwe kamaa wiidimi lwa Israeli Kalema iveekya kyeeri vakiduva valesha Nave mmbo arumataa Yakobo sha muro umamitaa wo kindo.

⁴ Mmbo aleluronga mife kavaka nkiduva, Kawaa wo kindo kilya lweevikye nsia, yaa Yerusalemu mmbo lulelollya unyafi lwakwe lwishakaa.

⁵ Nndumi Iruva mmbo alemamita Israeli kavaka nkiduva mmbo alera turuve takwe, na mmba ta kimangyi tikee irama, keengye vandu wa Yuda ting'wa ilasiaa.

⁶ Kafisha-fisha mmba ta Iruva alya lwekemwiindya, kaanta-fo mikonu myeele na sabato. Mangyi na nkohani vakalollya deny unyafi lwakwe.

⁷ Nndumi Iruva alelema kitara kyakwe kyeerasya, katakarakanisa ando kwakwe kweele, kairikya vakiduva vakawundwa isimamba lya-vayo, Vakaongoryau elyi valevinga, ando alya lwekeindya na nsia.

⁸ Nndumi Iruva mmbo alekunda muri wa Sioni uwe, kakunda uwe deny Minara ya-vayo na isimamba lya-vayo fyoose fikawunduka.

⁹ Ngiri ta vayo nnyefo-si tikee shuummbye, tikee shifishe-fishe. Mangyi amwi na vasongoru vakakamarwa kundo kweny. Kundo kulaifo usumanu nta vakisuku mmbakikeewonisa myoorya ooka kwa Nndumi Iruva-fo.

¹⁰ Vamiku va muri wa Yerusalamu mmbo vakee vavike rembo yoo si vamalallye sa-u, veree makunya vefwani kiluulyi nrweny, Vana va kika vainyikye mirwe yaawo si.

¹¹ Miso akwa mmbo afwa kimaruma kya iiya, nrima ukarovyo nuukiva, nrima wakwa mmbo waariswa ni ukiva elyi vandu wakwa valemamitwa. Vana vadu na vakoku mmbo vakeyuumya efyo shieny ta muri.

¹² Veetirwa nshaa na nyura mmbo vakefuuya vamaye, vakawa efo sheelyi vakee vaondore, vakafiiya efo maakony a vamaye.

¹³ Woo Yerusalemu, muri nkunde, shaamba-ki?, Mmbo nkuviryaa inda muu, nkwiifo nndu alembona ukiva sheelu-fo. Urumato lwafo llutiri nnyanu-fo, shaasa yeeve lyikai,

¹⁴ Vakisuku vafo mmbetiri kyeyaamba kuuta wongo-fo, na ufundo lwawo lukulemba elyi aleereya ipaana ulyamari lwafo. Neewe kwakusara nkutiri kimaruma kyeekurya-fo.

¹⁵ Vandu vakeira shia mmbo vakeekulla na kiila, Vakasisika mirwe yaawo na veeseka elyi Yerusalemu ulerumatwa, “Yeu nto muri ulya wekee itumbe insha indo? Ekyi llyo itumbe lya ulana ifura lya loose?”

¹⁶ Vakiduva vafo woose mmbo vakumina, vakakulla na kisunya vakaamba, “Lwammamita Yerusalemu! Ekyi nkyo lweekunde.

¹⁷ Nndumi Iruva ammiinutya kilya, kalumamita deny shaasa eluvia. Keekya vakiduva naambo valuvinge, kavaniinga ifura elyi lulewa.

¹⁸ Woo Sioni, isimamba lyafo lufuuy Nndumi Iruva! Misoru yafo ipusuke sha mura kio na nsanyiny. Ngatara na ukiva lwafo fikunirise!

¹⁹ Kio kyoose kupoo lyingi na lyingi kufuuye Nndumi Iruva, tarambwa nrima wafo kumfuuye nalyillye vana vafo, vana yewo vakewaawa nshaa efo shieny toose ta muri!

²⁰ Woi Nndumi Iruva lola-dwa! A mmbakyi kukee vatannya indo? Vaka mmbo vakeelya vana vawo vakunde!

²¹ Vandu vakuu na vana nyefo shia valele vamfwa, nnyewe Nndumi Iruva kulevasisa indo kimaruma kya unyafi lwafo.

²² Mmbo kulevaanga vakiduva vakwa vashiringitye na uravi elo. Nta kulakae-fo nndu eeshidimaa iturunya unyafi lwa nkonu eto, vakamamita vana vakwa, shilevalela, shivakunndye.”