ESTA 6 - BIBILLYA Mareiyo Meele a Iruva

Mangyi ang'anisa Mordekai

¹ Nalyo kio ekyo mangyi nnyaleerera nta rwe imwi-fo, kavavasya neengyo kyitabu ekyo kitiri mbony toose shaasa tikeetanyika efo urukeny lwakwe, nawe kasomyo toose.

² Kikakooyo-fo shaasa kikee kireiye sheelyi Mordekai mmbo aleriingya Bigtana na Tereshi valya vekee veekallya findo fya mangyi, vakaveringa yoo ngiriny, na mmbo yewo vekeeringya mangyi Ahasuero.

³ Mangyi kaamba, “A nkyoki Mordekai aletannyo kyeemwaana elyi aletana indo?” Vasero va mangyi vakammbia, “Nnyaletannyo nta kindo-fo.”

⁴ Mangyi kookafo kavesa, “Kulya kari kwiifo nndu?” Na Hamani mmbo ensha kakaa efo kari ka mmba ya mangyi, naambo navere ikamba lyeerera na mangyi, naambo nanniinge muumu wendewanika Mordekai kulya nriny ulya alen-deesya.

⁵ Vasero va mangyi vakammbia, “Akoolya Hamani akee alya kari.” Mangyi kaamba, “Mmbyeny naange.”

⁶ Naasa Haman kaanga. Mangyi kammbia, “A nkyoki atannyoo nndu yeto mangyi akundye innganisa?” Naasa Hamani kakusara efo nriminy wakwe, “A mmbi ungyi mangyi ashiidimaa inng'anisa ngota yeny?”

⁷ Naasa Haman kavia mangyi, “Nndu yeto mangyi akundye inng'anisa,

⁸ neengyo masara a kimangyi alya mangyi muni araa, na frasi yeyo mangyi aisaamaa, naveraa na kofia ya kimangyi,”

⁹ na masara yoo a kimangyi na frasi yeyo arambikkyo nndu atiri nnduma, navike nndu yeto mangyi akundye inng'anisa, namwiirye mbee eesaamye frasi eesoraa shia niini ya muri, nakape weele naambe, “Niindi atannyoo nndu yeto mangyi akunndye inng'anisa.”

¹⁰ Naasa mangyi kavia Haman, “Kyasia, ipoo na ngeta masara yoo na frasi shaasa llya kwaamba, kundetannya Mordekai, Myuda yeto akaa yoo mwaangony kwa mangyi, kulore kushaalashaau nta irero lyimwi lya yoo kwaamba.”

¹¹ Nalyo Haman kandevika Mordekai masara yoo na frasi yeyo kansaamisau, kairyany frasi mbee, eeshiiraa shia niini ya muri, kakapa weele kaamba, “Nndu yeto mangyi akundye inng'anisa niindi atannyoo.”

¹² Naasa numa Mordekai kashekaa alya mwaangony kwa mangyi. Lyo we Haman kaangusya yeenda kyeny, ekee sheelyi afiyyo, keenda eeinyikye nrwe.

¹³ Naasa Haman llya alefika kyeny kandeongoya nka wakwe Sereshi na vambuya vawo mbony tilya toose. Llyo vandu yewo vakwe vatiri urango, na nkaakwe vakammbia, “Kwankooya Mordekai yeu akufwallya si, mmbwa ufyari lwa Vayuda, nkumwiidimaa-fo, nkuti nakumamite.”

Haman Awaavo

¹⁴ Llya veekerera nawe indo, veesalallya kulya kwa mangyi vakasha nang'u vakamwiitika naangusye yeenda sukukuuny ilya ya nka-mangyi Esta.